لہور دا جواب

چندی گڑھ دی اک کوی کڑی لہور دے ناں چٹھی لکھی، جس نے میرے ورگے کئی اجیہے پنجابیاں نوں جواب لکھن اتے مجبور کردتا ہووے گا، جنہاں دے وڈکے سرحد دے اوس پار توں 72 ورھیاں پہلاں تقسیم ویلے تکلیف تے دکھ دیاں کہانیاں اپنے نال لے کے آئے، جیہڑیاں مرن والے اپنی اگلی پیڑی نوں یاداں دی پٹاریاں وچ حوالے کرگئے، یاں اوہناں وچوں کئی ہالے تائیں اوس زخم نوں اک پاسے رکھ کے اودھر دیاں چنگیاں تے محبت والیاں گلاں نوں اوس پٹاری وچوں کڈھ کے تیجی پیڑی نوں سنادے نیں۔
میرے ورگے جنہاں نوں اوس پار جاکے کجھ اندازہ ہوگیا، پئی سرحد پار بندے تے وس دے نیں پر، اک شے سیاست تے راکھی دے خاص بندوبست ہوندے نیں، جنہاں دی اپنی پرمپرا اے۔ گوانڈھی دے عیب کڈھ کے دسنے تاں جے اوس نال بوہتا میل ملاپ ای ناں ودھ جاوے۔
جے اودھر والے مسلمانوں نوں ایہہ یقین دوان وچ لگے رہوے کہ سرحد دے اوس بنے تہاڈے سکے نئیں، اوہ تہانوں ورغلا رہے نیں، اوہ تاں آپ اک نئیں رہ پاندے،
تاں ایدھر والے وی جنہاں مرضی اپنیاں نوں سمجھاندے رہن پئی سانوں اوہناں دا بڑا دکھ اے، اوہ وکھائی نئیں دیندا۔
دوہاں پاسے بیان بازی دے نال کدے کدے گولے ورسائے جاندے نیں۔ آکھن نوں امن دی سدھر سبھ نوں اے۔ دلوں وکھاونا کجھ اوکھا جیا جاپدا اے۔
پیار محبت امن شانتی ہورے کتاباں وچ لکھ کے بھلھ بیٹھے ہیں۔ وڈا دل کھلا پن نہ جانے کس نوں کہندے سن۔ میری جت دوجے دی ہار، ایس توں ودھ لگدا کجھ نئیں درکار۔
سیاست دی کڑتن مٹھے بول وی کوڑے ای سٹ دی اے، بندے نوں بندے دا ویری بناون دی راہواں تلاشن لئی آہر کیتے جاندے نیں۔
لہور نوں اج وی اڈیک اے دوہاں پاسے دے بیلی ایتھے آکے اک دوجے نوں پھول وی دین تاں پیار دی محبتاں وی ونڈن، ایس دی تریخ گواہ اے، صدیاں لنگھ گیئاں، بڑے دھاڑوی آئے، ایس نے کسے دا دھرو تے ظلم کدے جتایا نئیں ناں کدے گلہ کیتا تے ناں اوس نوں دل اتے لایا، جد وی ونڈی پیار دی مٹھری دید لحاظ، بھائی بندی، ہونٹاں اتے ہسی تے وڈکیاں دے آکھان۔
لہور اج وی آکھ دا اے آو میں تہانوں اپنی تنگ گلیاں وچ خلوص تے پیار دی دنیا وکھاواں۔ پیسے دولت دی دوڑ بہانویں لگی اے، ایس سبھ وچ ہالے وی لہور اپنی بانہواں کھلیاں رکھ دا اے۔ اوس نوں کسے نال کوئی لاگت بازی نئیں۔
لہور نوں ہالے وی سرحد پار تو اجیہی ڈاک دے تانگ لگی رہندی اے۔ کدوں کوئی اوس نوں اپنی یاداں دی پٹاری چوں کڈھ کے نوویں پیڑی نوں دسدا اے۔ لہور دا جواب تے ہر ویلے تیار ای رہندا اے۔
لیکھ ،صوفی نعمان یاور