لکھاری زاہد اقبال بٹ ۔
لوکاں نوں غلطیاں کرکے تھکن دی عادت اے کسے نال بھڑھ کے صلاح کرن دی عادت اے جوانی عیباں نال کھیڈ گذارن مگروں معافی منگن دی جدی پشتی عادت اے تے لوک ویہار دے میلے ٹھیلے تے تخلیقی کماں وچ رنگ بازی تے لکھاں سال تریخی شیواں مورتیاں نوں پن تروڑ کے موروثی عادت نوں پورا کرنا فرض سمجھدے نیں۔ اجو کے سمے دا انسان سطحی انداز نوں اپنا کے اپنیاں لوڑاں تھوڑا پوریاں کررہیا اے اے سٹے وچ اج دا انسان اک دوجے لئی بے اثرہندا جا رہیا اے ساک ،شریک ،برادریاں سبھے تناؤ دا شکار نظری آؤندے نیں کوئی کسی دی گل سنن واسطے تیار نیں جے کر اوہ سنن لئی تیار ہو وی جائے تے دھیان دے رستے بند ہوون پاروں اوھ تہاڈی گل نو غور نال سندا ای نیں کیونجے اوہ معاشی لین دین وچ مصروف اے اس واسطے تہاڈی گل اوہدے لئی کوئی معنے نیں رکھدی ہن اسیں ٹیوا لائیے ایہدے وچ نقصان کی اے پر ایہہ جاننا وی ضروری اے کہ اس فائدے وچ نقصان کی ہو رہیا اے حقیقت وچ گل نکھڑ کے ساہمنے آوندی اے کے اساں ہن داخلی انداز نال شیواں نوں دیکھنا چھڈ دیتا اے جہدے سٹے وچ انساناں وچ بے چینی تے خوف ودھدا جا رہیا اے اسیں کوئی وی کم پیار محبت تے جی جان نال کرنا نہیں چاؤہندے ای نہیں کجھ لمحے اپنے آپ نال گذارنا ای نہیں چاؤہندے یعنی اپنے آپ نال محبت کرنا ای نہیں چاؤہندے اس توں اڈ اپنے آپ نال میل کرنا نہیں چاؤہندے اک گل چیتے رکھن جو گ اے اپنے آپ نال محبت کرن والا بندہ ہی دوجے انساناں نال جڑدا اے تے او تقسیم ہوون توں بچدا اے ۔اجیہا ں انسان کسے مغالطے وچ نہیں رہندا اپنی حیاتی نوں سدھا پدھرا اپنی مرضی نال کردا اے کسے دے آکھے لگن دی تھاں اپنی مرضی کر دا اے۔ مڑاجے بندے نوں چاریا ای نہیں جا سکدا تے نہ ہی انہوں کراہے پا یا جا سکدا اے کیو ں جے اوہ اپنے آپ نال جُڑیا ہو ندا اے ۔
انسان معاشی وچار وٹاندرے وچ اینہاں کوں پھس گیا اے کہ اوہنوں ہور کسے دی کوئی گل دی سمجھ وی نہیںآوندی۔ چالی(40)انچ سکرین تے مہنگی دل کھچویں ٹیکنالوجی والیاں شیواں اپنے گھر وچ ڈھیر لا رہیا اے تے دوجے پاسے ہتھی کم کرن دیاں گھروکی شیواں سمیت کتاباں نوں بنیں لئی جارہیا اے چونویں گل ایہہ اے کہ خواہش دے شروع ہو ون توں لے کے مکن تائیں وچلا پینڈا بے صبری تے بے چینی دی حالت وچ لنگھ دا اے جس چیز نوں حاصل کرن لئی دن رات اک کیتے( اک ادھے نوں مدھیادی )پورن مگروں چند لمحیاں مگروں اوہدے نال کھیڈ کرن مگروں شدت گھٹ دی جاندی اے ۔اجیہی خواہشاں پالن دی وجہ توں جُسے وچ موجود لکھاں لہو سلاں دی بھن تروڑ ، معدے تے دماغ دا بیڑا غرق ہو جانداے تے لہو دے قدرتی بہاؤ نوں متاثر کر دا اے سچ آکھاں تے بندے نوں ذہنی مریض (ڈپریشن)بنا دیندا اے اس وجہ توں سوچن سمجھن دی صلاحیت ،انسانی ٹہل ٹکور دے وچار تے میل ورتن ہولے ہولے انسانی زندگی وچوں ڈھلنا شروع ہو جا ندا اے ۔ سٹہ اے نکلیا کہہ سائنس ٹیکنالوجی انساناں واسطے ضروری اے پر سائنس لوکاں نوں Moral Value نہیں سکھاندی پر والدین سمجھدے نے اہناں دا بال سلا م دا جواب وی دیوے۔ آخیری گل ایہہ اے جد لوکاں واسطے سماجی بُنتر بنائی جائے تے اخلاقیات اور سائنس وچ فرق گھٹ و گھٹ ہووے تاں جے انسان کراہے پین توں بچ سکے ۔
918
