محسن عباس دی بیوی نال لڑائی، نوکری وی گئی

اداکار، گلوکار تے ٹی وی شو دے ڈی جے محسن عباس حیدر دی اپنی سوانی نال گھر وچ جھڑپ ہوئی، دوہاں دا اختلاف سوشل میڈیا اتے چلن مگروں گل عدالت تیک اپڑگئی، اوس دی بیوی آپ وی اینکر اے اوس الزام لگایا پئی محسن اوس نوں ماردا اے اوس دے کسے ہور زنانی نال تعلق نیں، اوس نال ویاہ وی کرنا چاہندا اے۔
محسن دا آکھنا اے دوہاں وچکار تعلق ٹھیک نئیں سن، جیہدے مگروں اسیں طلاق دی تھاں وکھرے ہوون دا فیصلہ کیتا۔ اوس ایہہ وی منیا پئی پہلاں جھگڑا ہوجاندا سی، فیر وی جیہڑے فوٹو وچ زخم وکھائے گئے نیں،اوہ گھروں پوڑیاں توں ڈگن کارن ہوئے سن۔ دوہاں جیاں اپنے بیان ایس پی کینٹ نوں ریکارڈ کرادتے، عدالت وچ جاون توں پہلاں دونوں اپنے موقف اتے ڈٹے نیں۔
دوجے پاسے ٹی وی شو دی انتظامیہ محسن عباس نوں ایہہ آکھ کے نوکری توں کڈھ دتا پئی عدالت وچ اپنی بے گناہی ثابت کرکے آجاو تہانوں رکھ لوواں گے۔ اپنے ذاتی جھگڑے پاروں اوہ نوکری توں وی فارغ ہوگئے۔ ویکھنا ایہہ وے پئی عدالت وچ کوں سچا ثابت ہوندا اے ایس نوں کجھ چر لگ جاوے گا۔