ماں بولی انسان دی پہچان اے، ٹیگور

لکھاری، بلراج ساہنی

اوہناں دناں میں شانتی نکیتن وچ پڑھانا ساں، اک دیہاڑ میں ورھے گنڈھ ،سالانہ تقریب لئی رابندر ناتھ ٹیگور نوں سدا دین لئی گیا، گل بات دوران اوہناں مینوں پچھیا پڑھان توں ہٹ کے توں کیہ کرنا ایں۔ میں دسیا پئی ہندی دی کہانیاں لکھدا آں، جیہڑی ہندی دے اک وڈے میگزین وچ چھپ دیاں نیں۔ ایس لکھن پاروں میرا بڑا نام بن گیا اے۔

ٹیگور آکھیا ہندی تیری ماں بولی نئیں اے توں اک پنجابی ایں توں پنجابی وچ کیوں نئیں لکھدا؟
میں سمجھیا ٹیگور کوئی تنگ نظر تے صوبائی سوچ رکھن والا انسان اے، اوہدوں میرا خیال سی پئی بندے نوں اپنی عالمی پدھر اتے پہچان بناون لئی پہلاں قومی سطح اتے کوئی مقام بنانا چاہیدا اے۔
میں ٹیگور ہوراں نوں آکھیا ہندی ساڈی قومی زبان اے تے پورے ہندوستان وچ بولی جاندی اے۔ میں کیوں اک صوبائی زبان وچ لکھاں۔
ٹیگور آکھیا، میں بنگالی وچ لکھدا آں، جیہڑی اک صوبے دی زبان اے۔ ایس دے باوجود نہ صرف ہندوستان سگوں پوری دنیا مینوں پڑھ دی اے،۔
میں ٹیگور نوں آکھیا تہاڈے وانگ میں وڈا لکھاری نئیں،
اوہناں جواب دتا ایہہ وڈے یاں چھوٹے ہوون دی گل نئیں اے۔ لکھاری دا اپنی جنم بھومی ، اپنے لوکاں تے زبان نال اک رشتہ ہوندا اے۔ اوہناں وچ ہوون دی گرمی تے جذبے اوہناں دی وچ رہ کے ہی ملدے نیں۔
میں آکھیا ساڈے پنجاب وچ ہندی تے اردو وچ لکھیا جاندا اے، تہانوں شاید ایس دی جانکاری نہ ہووے۔ پنجابی نوں بوہت پچھل تے گھٹ ترقی والی زبان جانیا جاندا اے۔ کوئی پنجابی وچ نئیں لکھ دا۔ ایمانداری دی گل دسا تے پنجابی نوں کوئی زبان دے طور اتے قبول نئیں کردا۔
ٹیگور آکھیا میں ایس گل نوں نئیں من دا، پنجابی تے بنگالی ادب بوہت پرانا اے۔ کدے ایس زبان اتے غور کیتا ایس دے گورونانک ورگے وڈے شاعر تے لکھاری گزرے نیں۔ ٹیگور اوس ویلے نانک دے بول بولے۔ جیہڑے میرے ذھن وچ نقش کرگئے۔
میں ٹیگور نوں آکھیا جدوں ہندوستان آزادی دی جنگ لڑرہیا سی اوس نوں اک قومی زبان دی لوڑ سی، کانگرس ایس نوں راشٹریہ بھاش بناون لئی بڑے جتن کیتے سن۔ میرا نئیں خیال ٹیگور میری گل نال سیمتھ ہوے۔
ہاں جد میں اوہناں توں رخصت ہوون لگیا تاں دروازے کول اپڑن ویلے اوہناں مینوں اک گل کیتی جیہڑی اج تائیں میرے دل وچ وس کئی، تے جنہے مینوں اپنی ماں بولی وچ لکھن اتے مجبور وی کیتا۔
“طوائف ساری دولت وی اکٹھی کرلئے، اوس نوں سماج دا آدر تے سمان نئیں ملدا، انج ای ساری حیاتی دوجی زبان وچ لکھن نال تہاڈے اپنے لوک تہانوں قبول کرن گے ناں ای جنہاں دی زبان تسیں لکھ رہے او۔ تہانوں پہلاں اپنے لوکاں دے دل جیتنے ہوون گے۔

ہندوستان فلم انڈسٹری دے مہان لیکھک، ڈائریکٹر تے کلاکار بلراج ساہنی دا اک لیکھ