لہور (سجن رپورٹ) بلوچستان وچ کوسٹل ہائی وے تے اورماڑہ دے علاقے وچ ات گرداں دے اک جتھے نے مسافر بساں نوں ڈک کے سواریاں دے شناختی کارڈ ویکھ ویکھ کے ڈیڑھ درجن سواریاں نوں تھلے لاہ لیا تے گولیاں مار کے قتل کر دتا، ات گرداں دا جتھہ واردات کر کے فرار ہو گیا۔ آئی جی بلوچستان محسن بٹ نے کہیا اے بئی ایس دہشتگردی دے مقاصد دا اجے کوئی پتہ نہیں۔ محسن بٹ نے صحافیاں نوں دسیا بئی جمعرات 18 اپریل دی ادھی رات ساڈھے بارہ وجے توں اک وجے دے درمیان پندرہ ویہہ ات گرداں دے اک جتھے نے مکران کوسٹل ہائی وے تے اورماڑہ دے علاقے وچ سڑک ڈک لئی تے کراچی توں گوادر جاون، آون والیاں پنج مسافر بساں ڈک لئیاں تے مسافراں دے شناختی کارڈ ویکھ ویکھ کے اک خاص کمیونٹی دے لوکاں نوں بس توں لاہ کے گولیاں مار دتیاں، 14 مسافر تھاں تے مر گئے۔ بلوچستان دے سیکرٹری داخلہ حیدر علی نے اژانس فرانس پریس دے رپورٹر نوں دسیا کہ سڑک ڈک کے مسافراں نوں قتل کرن۔والیاں نے فرنٹئیر کور (F.C) دیاں وردیاں پائیاں ہوئیاں سن۔
اک مقامی اہلکار جہانگیر دشتی نے پترکار نوں دسیا کہ دہشتگرداں نے اک ہی بس وچوں 16 بندیاں نوں باہر کڈھ کے سڑک تو پرانہہ لے جا کے گولیاں ماریاں۔ دو بندے گولیاں کھا کے زندہ بچ گئے تے اوہناں نس کے اک لیویز چیک پوسٹ تے ہہنچ کے ایس خونی واردات بارے دسیا۔ دہشتگرداں دے ہتھوں قتل ہوون والیاں وچ نیوی دا اک افسر تے کوسٹ گارڈ دا اک ملازم وی شامل نیں۔
چیتے رہوے کہ 2015 وچ وی بلوچستان وچ دہشتگرداں مستونگ دے علاقے وچ کراچی جاون والیاں دو مسافر بساں نوں ڈک کے 16 مسافراں نوں وکھرا کر کے قتل کر دتا سی
![](https://sajjanlahore.com/wp-content/uploads/2019/04/43B99A2F-8118-4534-B453-139C9AD203F3.jpeg)