لکھاری
راجہ مبین اللہ خان
نیوزی لینڈ دے شہر کرائسٹ چرچ وچ ات گرداں ولوں مسیتاں اتے حملے کر کے پنجاہ توں ودھ بندے مارن تے اڑتالی بندیاں نوں پھٹڑ کرن دے وقوعیاں نے اک نویں بحث چھیڑ دتی اے۔ مینوں بڑا اوکھا لگ رہیا اے بئی کس طرحاں لوکاں نوں دساں کہ کوئی وی مذہب ات گردی سکھاؤندا نہیں پر ات گردی لئی ورتیا مذہب ای جاندا اے۔
ساڈے کول سب توں وڈی مثال مسلماناں دی اے۔ سعودی عرب دے بادشاہ نے ٹی وی اتے بہہ کے ایہہ گل آکھی اے بئی وہابی ازم اصل وچ سرمایہ دار دنیا دے آکھن اتے بنایا گیا سی تے لوکاں وچ ایس نوں ودھاون لئی امریکہ ، برطانیہ تے دوجے ملکاں دی خفیہ ایجنسیاں نے پیسے تے صلاحیتیاں ورتیاں۔ مینوں کدی کدی ایہہ لگدا اے بئی ات گردی پورے جگ وچ خفیہ ایجینسیاں دے ہتھ وچ ہتھیار اے۔ ایہہ ایجنسیاں جدوں چاہندیاں نیں اوس ویلے کسے پاگل بندے نوں ورت کے اپنا کم کڈھ لیندیاں نیں۔ تے رولا پا دتا جاندا اے بئی تہذیباں دا آپس وچ ٹاکرا ہو گیا اے۔
ایہدی وڈی مثال ہندوستان دی ونڈ ویلے ہوئے فساد نیں۔ ایہہ فساد اوس ویلے دی سرکار نے اپنی خفیہ ایجنسیاں تے اوہناں دے کارندیاں نوں ورت کے شروع کرائے۔ ایس کم نوں ونڈ مگروں وی چالو رکھیا گیا تے ہندوستان تے پاکستان وچ ویلا پین تے فسادات شروع کرا دتے جاندے نیں۔
میری جان وچ کسے اک بندے دا مذہب پوری وسوں لئی فائدہ مند یاں نقصان دین والا نہیں ہوندا۔ ایہدا نقصان اوس ویلے شروع ہوندا اے جدوں ایہہ سند سرکار پھڑ لووے تے ایس نوں ورت کے لوکاں نوں آپس وچ لڑاوے۔
ایہہ گل وی عین اوس ویلے شروع ہوئی جدوں پاکستان دی اک زنانی ڈاکٹر عافیہ صدیقی ات گردی دے دوش وچ امریکہ دی جیل وچ بند اے تے افغان طالبان اوس دی رہائی دی منگ کر رہئے نیں۔ پہلی گل تے ایہہ اے بئی جے ڈاکٹر عافیہ نے کوئی جرم کیتا سی تے اوس نوں پاکستان وچ سزا ملنا چاہیدی سی۔ اوس ویلے دی سرکار دے آگو نے اوس زنانی نوں امریکہ دے حوالے کر کے انساناں نوں ویچن والا کم کیتا سی۔ مرداں نوں ویچنا تے جرم ہے ای اے زنانیاں نوں ویچنا جرم دے نال نال بے غیرتی وی اے۔
جیہڑے لوک ات گردی کرن دے جرم وچ پاکستانی ڈاکٹر عافیہ صدیقی نوں پھڑ کے لے گئے نیں اوہی لوک امریکی شہری ریمنڈ ڈیوس نوں ات گردی کرن مگروں چھڑا کے وی لے گئے۔ جرم اکو اے تے اوس جرم وچ اک نوں جیل تے دوجے نوں رہائی مل گئی۔ آکھیا جاندا اے بئی عافیہ نوں پھڑان تے ریمنڈ ڈیوس نوں چھڈان واری پیسے کھاہدے گئے۔ کس کھاہدے اوہ سارے جاندے نیں۔
ہن سوال اے بئی پاکستانی سرکار آکھدی پئی اے کہ اوہ ات گردی والا راہ چھڈنا چاہندی اے۔ جے ایہہ گل سچ اے تے عافیہ صدیقی سے امریکہ دی جیل یاں پاکستانی جیل کدھرے وی رہن نال فرق نہیں پیندا۔
عافیہ نے پہلی گل تے کوئی جرم نہیں کیتا تے دوجی گل اوس کوئی جرم کیتا وی اے تے اوس جرموں ودھ سزا کٹ لئی اے۔اوس نوں پاکستان لے آؤ۔ میں عافیہ دی سوچ دا وڈا مخالف آں پر اوس نوں انج تسیہے دینا تے جیلاں وچ سٹنا مینوں قبول نہیں۔
تے اخیر وچ اپنی کاہڈھ دساں؟
اسی لکھ مکر دے رہئے۔ ات گرد وچوں پکے مذہبی نکل دے نیں۔
