334

2019 : 10 کامیاب پاکستانی کھڈاری

سال 2019 کھیڈاں دے میدان وچ پاکستان لئی چنگا رہیا،ایس ورھے پاکستان نے چوکھیاں کامیابیاں سمیٹیاں، مگر کجھ ایتھلیٹ اجیہے سن جنہاں پاکستان نوں نمایاں مقام دوان وچ اہم کردار ادا کیتا۔


انعام بٹ نے ایس سال پاکستان لئی ورلڈ بیچ گیمز وچ ریسلنگ دے مقابلیاں وچ گولڈ میڈل جیتا۔ ایہناں مقابلیاں وچ پاکستان دا پہلا گولڈ میڈل اے۔
انعام نے ساؤتھ ایشین گیمز وچ وی سونے دا تمغہ جیتا جد کہ نیشنل گیمز وچ گولڈ میڈل انعام بٹ دے نام رہیا، ایہہ اوہناں دا مسلسل تیرہواں قومی گولڈ میڈل سی۔

سال دے بہترین پاکستانی ایتھلیٹاں وچوں جویلین تھرو وچ پاکستان دی نمائندگی کرن والے ارشد ندیم دوجے نمبر اتے نیں۔
ارشد نے ایس ورھے دسمبر وچ ہون والے ساؤتھ ایشین گیمز وچ رکارڈ 86 عشاریہ 29 دی تھرو کرکے نہ صرف پاکستان سگوں ساؤتھ ایشین گیمز دا ریکارڈ وی بنایا تے ساتھ ساتھ ٹوکیو اولمپکس لئی بھی کوالیفائی کرلیا۔

محمد آصف دا شمار پاکستان دے کامیاب ترین اسنوکر پلیئرز وچ ہوندا اے۔
اپنی خوبصورت پوٹنگ تے شاندار کیو کنٹرول پاروں مشہور محمد آصف ایس ورھے عالمی اسنوکر چیمپئن شپ دا اعزاز پاکستان دے نام کیتا۔

سال دے بہترین ایتھلیٹاں دی لسٹ وچ چوتھا نمبر بابر اعظم دا اے۔
اونج تاں بابر دے کارنامے بوہت نیں لیکن ایہہ گل وی ویکھنی ہووے گی کہ بابر اعظم نوں اوہ ساری سہولتاں ملیاں نیں، جیہڑی کرکٹ توں اڈ دوجے کھیڈاں دی کھڈاریاں نوں نئیں ملدیاں۔
بابر اعظم نے ایس ورھے تیناں فارمیٹ وچ مجموعی طور اتے 2082 انٹرنیشنل رنز بنائے ۔
صرف ویرات کوہلی تے روہت شرما نے بابر اعظم توں ودھ رنز بنائے نیں۔

محمد وسیم ورلڈ پروفیشنل باکسنگ سرکٹ وچ شریک پاکستان دے نمایاں باکسر نیں۔ محمد وسیم نے ایس سال انجری توں جان چھڑا کے شاندار کم بیک کیتا تے اپنی دوناں فائٹس جت کے ورلڈ ٹائٹل ول پیر پٹیا۔
محمد وسیم نے ستمبر وچ فلپائن دے کونراڈو تانامور نوں صرف 82 سیکنڈاں وچ آوٹ کلاس کردتا۔
پاکستان دے لیجنڈ باکسر حسین شاہ دے جوڈودا بیٹے شاہ حسین شاہ نے وی پاکستان دا نام روشن کیتے رکھا۔ ساؤتھ ایشین گیمز وچ گولڈ میڈل حاصل کرن والے شاہ حسین شاہ نے ایس ورھے نمایاں پرفارمنس دے کے اولمپکس کوالیفائنگ وچ براعظمی کوٹے وچ تھاں بنالئی۔

شاہ حسین ایس سال ایشیا پیسفک چیمپئن شپ اورابوظہبی گراں پری وچ نمایاں کارکردگی دا مظاہرہ کردیاں ٹاپ فائیو وچ فنش کیتا تے اولمپکس وچ اپنی رسائی دی راہ ہموار کردتی ۔

پاکستان ویمن ٹیم دی کپتان بسمہ معروف نے ایس سال ویمن کرکٹ وچ بیٹنگ دے شعبے وچ نمایاں پرفارمنس دا مظاہرہ کیتا تے اپنی صلاحیتاں دا لوہا منوایا۔
بسمہ نے سال 2019 وچ 14 ٹی ٹوئنٹی میچاں وچ 459 رنز سکور کیتے جو کسے وی فل ممبرز ٹیم پلیئر ولوں ویمن ٹی ٹوئنٹی وچ سبھ توں ودھ رنز نیں۔

کراٹے کھڈاری سعدی عباس دا شمار ملک دے ٹاپ کراٹیکاز وچ ہوندا اے۔ سعدی نے ایس ورھے ساؤتھ ایشین گیمز وچ پاکستان لئی 2 گولڈ میڈل جتے۔ اک گولڈ میڈل 75 کلوگرام دے اکلے مقابلیاں وچ تے دوجا گولڈ میڈل ٹیم ایونٹ وچ حاصل کیتا۔
ایس سال اوہناں نے یو اے ای چیمپئن شپ وچ وی گولڈ میڈل جتا جد کہ ٹوکیو وچ وی شاندار کارکردگی دکھاکے اولمپکس کوالیفکیشن لئی قیمتی پوائنٹس حاصل کیتے۔

نجمعہ پروین دا شمار پاکستان دی بہترین زنانی ایتھلیٹاں وچ ہوندا اے۔
نیپال وچ ہوون والے ساؤتھ ایشین گیمز وچ نجمہ نے زنانیاں دی 400 میٹر ہرڈلز وچ پاکستان لئی سونے دا تمغہ جتا۔ اسی ایونٹ وچ اوہناں نے 200 میٹر دوڑ وچ پاکستان لئی سلور میڈل حاصل کیتا۔

ماحور شہزاد دا شمار پاکستان دی ٹاپ بیڈمنٹن پلیئراں وچ ہوندا اے۔
ایس سال اوہ ورلڈ رینکنگ وچ ٹاپ 150 وچ اپنی تھاں بناون والی پہلی پاکستانی زنانی بیڈمنٹن پلیئر وی بنیاں۔
ایس ورھے اوہناں نے پاکستان انٹرنیشنل سیریز وچ گولڈ میڈل جیتا۔ بلغاریہ انٹرنیشنلز وچ وی ماحور نوں برانز میڈل ملیا۔ ساؤتھ ایشین گیمز دے ٹیم ایونٹ وچ وی اوہ برانز دی حقدار قرار پاِئیں۔

اپنی رائے دا اظہار کرو