اسلام آباد:سرکار نے جمعیت علمائے اسلام (ف) نال گل بات وچ ناکامی مگروں مولانا فضل الرحمان نوں نظر بند کرن دا فیصلہ کرلیا اے۔
جیونیوز مطابق جے یو آئی (ف) دے 2 رہنما مولانا شفیق الرحمان تے مولانا محمد ارشاد نوں گرفتار کرکے اوہناں خلاف تھانہ شمس کالونی وچ مقدمہ درج کرلیا گیا اے۔
جیو نیوز دی رپورٹ مطابق اک اُچ پدھری بیٹھک وچ سرکار نے اسلام آباد وچ جے یو آئی ف دا دھرنا روکن دا فیصلہ کیتا اے، جیہدے لئی بھانویں مولانا فضل الرحمان سنے سارے آگوواں نوں نظر بند ای کیوں نہ کرنا پئے۔
وزارت داخلہ دے اچے وسیلے اپنی پہچان نہ دسن دی شرط مگروں دسیا پئی مولانا فضل الرحمان نوں31 اکتوبر دے دھرنے توں پہلاں ای نظربند کیتا جاسکدا اے۔
ذرائع مطابق ہوسکدا اے 26 اکتوبر نوں مولانا نوں پھڑلیا جائے، کیوں جے 25 اکتوبر نوں جمعہ ہووے گا تے حکومت جمعے توں پہلاں مولانا نوں گرفتار کرن دا خطرہ مُل نئیں لے سکدی ایسراں اوہ مسیتاں دی طاقت ورت سکدے نیں۔
جے یو آئی ف دے گھٹوگھٹ 8 وڈے لیڈراں نوں 16 ایم پی او تحت 30 توں 90 دناں لئی بند کیتا جاسکدا اے، جد کے پارٹی دے کامیاں نوں وزارت داخلہ دی ہدایت اتے صوبائی تے وفاقی قانون نافذ کرن والے ادارایاں ولوں تیار فہرستاں مطابق گرفتار کیتا جاسکدا اے۔
352
