کالا دھن صاف کرالو، ایمنسٹی سکیم آگئی

سرکار اپنی پہلی ٹیکس چھوٹ تے اثاثے ظاہر کرن دی سکیم سامنے لے آئی،وزیر اعظم عمران خان دی صدارت وچ وفاقی کابینہ ٹیکس ایمنسٹی اسکیم 2019 دی منظوری دتی۔اجلاس مگروں مشیر خزانہ عبدالحفیظ شیخ نے حماد اظہر تےچیئرمین ایف بی آر شبر زیدی، معاون خصوصی اطلاعات فردوس عاشق اعوان نال پریس کانفرنس کیتی۔
حفیظ شیخ دا آکھنا سی، ٹیکس ایمنسٹی اسکیم دامقصد ریونیو اکٹھا کرنا نئیں سگوں ایس دا مڈھلہ کارن معیشت نوں دستاویزی شکل (کاغذاں وچ لیانا)دینا اے۔ تاں جے معیشت تیزی نال چل سکے
مشیر خزانہ دا کہنا سی،30 جون تیک سکیم وچ شامل ہون دا موقع اے، سکیم وچ ہر پاکستانی شہری حصہ لے سکے گا،
عبدالحفیظ شیخ آکھیاسکیم تحت پاکستان اندر تےباہر سارے اثاثے ظاہر کرنے ہوون گے، ریئل اسٹیٹ سنےتمام اثاثے 4 فیصد دی شرح دے کےسکیم وچ شریک ہوسکن گے۔اوہناں آکھیا ایہہ اخیرلاموقع اے ،جیہڑا اثاثے ظاہرنئیں کرے گا، اوس دی جائیداد ضبط ہوجاوے گی نالے اوس نوں جیل وی گھلیاجاسکدا اے۔
اوہناں آکھیا ملک یا باہر نقد اثاثے ظاہر کرن تے شرط ایہہ وے کہ کسے بینک اکاؤنٹ وچ رکھا جائےجدکے ریئل اسٹیٹ دے بارے ایف بی آر دی متھی قیمت توں ڈیڑھ فیصد ودھ ہووے گی، تاں جے مارکیٹ دامل گھٹ ہوسکے۔
جے ایف بی آرمطابق کسے پراپرٹی دی قیمت 10لاکھ روپے اتے تاں اوس نوں 15 لکھ تے سفیدکیتا جاوے گا ایس اتے ڈیڑھ فیصددینے پین گے۔باہررہن والیاں نوں اوتھے رکھی نقدی سفیدکران لئی 4 فیصد نال ہور 2 فیصد دیناہوون گے۔
عبدالحفیظ شیخ آکھیا کہ آئی ایم ایف نال معاہدے توں کجھ لوکاں نوں قیمتاں ودھن دا ڈر لگدا اے، اسیں تن توں چار فیصلے کیتے نیں۔ جے بجلی دے مُل ودھے تاں 300 یونٹ توں گھٹ ورتن والیاں نوں کوئی فرق نئیں پوے گا،اوہناں لئی 216 ارب روپے بجٹ وچ رکھے گئے نیں تے ایس توں 75 فیصد صارفین نوں فیدہ ہووے گا۔