لکھاری
اسلم ڈوگر
جدوں دی پاکستان تحریک انصاف دی حکومت آئی اے پاکستان دے معاشی حالات بھیڑے توں بھیڑے ہوندے جا رہئے نیں۔ جس دن عمران خان نے وزیر اعظم دے عہدے دا حلف چکیا اوس دن پاکستان دے غیر ملکی کرنسی دے ذخیرے ساڑھے ستاراں ارب ڈالر سن۔ ساڑھے ست مہنے دی حکومت وچ عمران خان دی سرکار نے نو ارب ڈالر توں ودھ قرضے بیلی ملکاں توں چکے نیں جس پاروں پاکستان دے قرضے اک سو ترے ارب ڈالر تائیں اپڑ گئے نیں۔ملک دی قرضیاں وچ ڈبی معیشت سگوں تھلے دی تھلے ای جا رہئی اے جس پاروں سٹاک مارکیٹ پچونجاہ ہزار پوائنٹ توں گھٹ دے اٹھتی ہزار پوائنٹ تائیں اپڑ گئی اے۔
ایہہ سب کیوں ہوئیا؟ کیہ حکومت نے اپنے خرچے ودھا لئے؟ کیہ پیسہ چوری ہون لگ پیا؟ کیہ پیسہ ملکوں باہر ٹر گیا؟ کیہ پاکستان دے سرمایہ دار ڈر کے لک گئے تے کاروبار چھڈ گئے نیں؟ یاں کوئی ہور وجہ اے جس پاروں ملک تھلے ای تھلے جا رہیا اے۔
تھوڑا جیہا ویروا کرن تے کئی گلاں ساہمنے آندیاں نیں۔ سب توں پہلی گل تے ایہہ اے بئی سرکار نے ظاہری طور تے اپنے خرچے گھٹا لئے نیں۔ سارے ترقیاتی منصوبے بند کر دتے۔ وزیر اعظم ہاؤس دیاں مجھاں گاواں، کاراں تے دوجا سامان ویچ دتا گیا۔ پروہنیاں نوں روٹی کھوان دی ریت مکا دتی گئی تے نری چاہ تے بسکٹ دتے جاون لگ پئے۔ لگ دا اے خرچے گھٹ کر دتے گئے نیں۔ پھیر کیہ ہو گیا بئی پیسہ خزانے وچ نہیں رہیا۔ وزیر اعظم عمران خان نے چیمبر آف کامرس دے اکٹھ وچ تقریر کر دیاں وائس آف امریکہ دے ایس خبر دی تصدیق کر دتی بئی فوجی بجٹ جیہڑا گیارہ سو ارب روپئے سی اوہ ودھا کے سولہ سو ستر ارب روپئے کر دتا گیا اے۔ ایہہ پنج سو ستر ارب روپئے کتھوں آئے؟ ایہہ سارے پیسے ترقیاتی منصوبیاں نوں ڈک دے تے ساریاں وزارتاں دے خرچے ختم کر کے کڈھے گئے۔ کجھ ذریعاں نے دسیا اے بئی نری سی پیک دے ای ڈھائی سو ارب روپئے لے لئے گئے۔
وزارت اطلاعات دے پنجتالی ارب روپئے ختم کر کے دفاعی بجٹ وچ پائے گئے جس پاروں کئیں اخبار تے ٹی وی اپنا کم بند کرن تے مجبور ہو گئے۔ پاکستان دا سب توں پرانا اخبار نوائے وقت اپنا ٹی وی چینل تے اکا ای بند کر چکیا اے تے اخبار دے کامیاں نے کئیں کئیں مہینیاں توں تنخواہ نہیں لبھی۔ دوجے سب توں پرانے اخبار ڈان نے اپنے کامیاں دیاں تنخواہواں ادھی کر دتیاں نیں۔ ایس ویلے دوجے وڈے اخبار ایکسپریس نے اپنے کئیں دفتر بند کر دتے نیں تے اوہدے کامے سڑکاں تے رک رہئے نیں۔ سرکاری ٹی وی دے کامے دو مہینیاں توں ہڑتال کیتی بیٹھے نیں۔ سرکاری ایجنسی اے پی پی وچوں پنج سو بندے کڈھن دا منصوبہ بنیا اے۔
ٹرابسپورٹ دا شعبہ بند پیا اے۔ مال ڈھون والے ٹرک ہزاراں دے حساب کھڑے ہو گئے نیں تے اوہناں اتے کم کرن والے مزدور ہتھ تے ہتھ رکھ کے بیٹھے نیں۔ سرکار نے جیہڑے جیہڑے منصوبے چھوہن دا ہوکا دتا سی اوہناں وچوں اک وی شروع نہیں ہو سکیا۔ اتوں روز کوئی نہ کوئی شدنی چھڈ دتی جاندی اے بئی کسے نوں چھڈنا نہیں۔ ایس کر کے کوئی سرکاری افسر کم کرن تے تیار نہیں۔ ہر کوئی ڈر تے بہہ گیا اے تے فائل نوں ہتھ نہیں لاؤندا۔
تھوڑے دن پہلوں ریٹائر ہوون والے اک جج نے سرمایہ داروں نوں سد کے جھاڑن تے سودے بازی دی ریت پھڑ لئی سی۔ بحریہ ٹاؤن دے مالک نوں غیر قانونی زمین دے قبضے دے مقدمے وچ سد کے سودا بازی کیتی گئی۔ ایس پاروں سارے سرمایہ دار ڈر لک گئے۔
آخری گل ایہہ اے بئی ایہہ جیہڑی پھڑ تڑ کے بنائی حکومت اے ایہناں نریاں بڑھکاں ماریاں تے ایہناں کولوں حالے تائیں کوئی منصوبہ نہیں جس دے نال ملک نوں مشکل وچوں کڈھیا جائے۔
416
