” ٹھگی ٹھگیچی دی مالا ” : لکھاری زاھد اقبال بٹ

لکھاری . زاھد اقبال بٹ
ھن پردیسی پتر موڈھا دیون دی تھاں آن لائین اپنے توں وچھڑن والیاں یاں خوشیاں مناون لئی اپنا قیمتی ویلا کڈہ کے براہ راست فیملی نشریات راھیں دو اتھرو ٹپکا کے یاں دو (۲)۰ کوریو گراف سائینسی ٹھمکیاں نال سکرین اگے موجود تماشبین ٹبراں دا منوں رجن کر دا اے ۔۔۔۔۔۔۔۔ خشی یاں غم نال نڈھال ماپے گوگل پتر دی ایس سخی یانہ عمل توں صدقے واری واری جارھے ھوندے نِیں ۔ ایھ سائینسی اٹکل اشارے ۔ وہمی سہارے ، بھری رسوئی چ بھانڈیاں دے لشکارے ، اگ چڑھے پریشر ککراں وچ ابلدے، اڈدے خوشبوئی ہلارے ، منجیاں اتے رنگ برنگے مخمل شنیل لیڑیاں دے کھلارے ، اس دلدل وچ ھسدیاں ڈبدیاں دے حسین نظارے ، فرینکاں ، پونڈاں تے ڈالراں دے وگدے دھارے ، ٹھگیچے جاون دے ایہ ڈاکے ، ڈاکو سبھے سانوں جان توں پیارے ، رشتے ، رسماں ، ریت روائیتاں رمزاں ، قسماں ، ایہ یاد کیتے سب پہاڑے ، مرن جیون دے جدی پشتی پواڑے ، ڈھلے اتھرواں دے نکو نک بھرے پیپے سارے ، موڈھے نال موڈھا جوڑ روون دے ھلارے ،بلارے ، کھبے سجے جمے گھڑتیاں دے مسخارے شھد چٹخارے ، من مراداں دے ایہ کھابیا دے سجے سجائے دیوان خانے اجے رھن دیو ، بھکاں دے پہاڑاں نوں اجے سکنے پئی رھن دیو ، ایہ ٹھگی ٹھگیچی دی مالا گل پئی رھن دیو ، ایہ سونے دی زنجیری میریاں ساھواں دے نیڑے رھن دیو ۔۔۔ ایہ اصلے ، مسلے تدبیراں تقدیراں ، تقریراں ، تکسیراں دے سبق اجے رھن دیو ، ساڈا سارا جیون اس وھم وچ ٹکیا اے ایس نوں ایس ای تھاں گڈھیا رھن دیو ، ایہ ساڈے ڈھائے چڑھیا دھن جوبن خزینہ ساڈی بغل وچ اجے رھن دیو ، لسے کسبی ماڑیاں دی دھون ( گردن ) اجے ساڈے گوڈھے تھلے رھن دیو ، اساں رج بھکاں ھنڈاون ماریاں دا دل نھیں رجیا ، اجے بھکھیاں نوں بھکھ وچ تردیاں ڈبدیاں دا نظارہ رھن دیو ، تھانوں ساریاں نوں جلدی کس گل دی اے ، سانوں وی لوکاں دی مٹی پلیت کرن دا لیبارٹری ھنر تجربہ کردیا رھن دیو، ساڈے اندر وی سوچن سمجھن دی صلاحیت پلدی اے ، اپنے آپ نال سنگساری کرن دا جنون اجے جاری رھن دیو ۔ اپنے آپ نال سنگساری کرن دا جنون اجے جاری رھن دیو۔