843

شیر دی دھاڑ تے غریب دا بال

لکھاری، محمد حنیف
شکریہ بی بی سی

عمران خان دا ادھی راتیں توں کجھ پہلاں دی تقریر اگلے دیہاڑے سنیں۔ ایہہ خطاب سی یاں کسے بھوکھے شیر دی دھاڑ یاں جوابی شیر دا حملہ سی،
لوکیں پتہ نئیں کیوں تکنیکی خرابی پچھے پئے نیں، آواز غائب ہوجاون نوں سازشی کہانیاں بُن رہے نیں، مینوں تاں لگیا کہ آواز شاید ایس لئی غائب کرنی پئی کہ خان صاحب جوش وچ آکے کدھرے ایہہ کہہ نہ دین کہ پہلاں ساریاں نوں اندر کراں گا فیر میں آپ نوں وی اندر کردیاں گا۔
دل اتے ہتھ رکھ کے دسو کہ کون اے جیہدے مونہہ توں ادھی راتیں کدے اجیہی گل نئیں نکلی۔
شیر دی دھاڑ وچ بجٹ دا نوحہ دب جیہا گیا جس نوں پوری قوم کجھ گھنٹے پہلاں سنیا سی۔ مینوں مان اے کہ میں وی ایس قوم دے بڈھرے مرداں وانگ معاشیات نوں روحانیت تے اخلاقیات دی شاخ سمجھدا آں تے سبھے لوکیں جس دیہاڑے ایماندار ہوجاون گے اوس دیہاڑے اسیں وی دنیا دی ایماندار قوم بن جاواں گے۔
جیویں ساڈے محبوب چیف جسٹس ثاقب نثار دا فرمان سی کہ تسیں جان دے او پاکستان تے چین وچ کیہ فرق اے؟ اوتھے مالی سارا دن کم کردا اے تے ساڈا مالی ادھا گھنٹہ گوڈی کرکے سگریٹ پین لگ پیندا اے۔
تاں بجٹ دا نوحہ سن کے ایہہ سمجھ نئیں آئی کہ مالیاتی خسارہ کیہ بلا اے، دفاعی بجٹ وچ وادھا ہویا یاں نئیں، صوبیاں نوں کیہ زیادہ ملیا یا نئیں؟
ویکھن وچ انج ای لگیا پئی پلاٹاں، گڈیاں دی قیمتاں تے آٹے دال دا مُل اپنی تھاں اتے رہیا، کھنڈ، چینی دی قیمت اتے ساڈھے تن روپے وادھے دی صلاح سن کے دل اداس جیا ہوگیا تے اک پرانا فوجی لطیفہ یاد آگیا۔
کئی ورھے پہلاں فوجی افسراں دی تربیت، اوہناں دی حیاتی تے قربانیاں بارے اک ٹی وی سیریل بنی، جیہدا ناں سنہرے دن ۔ اوہدے ڈائریکٹر جدید ٹی وی دے بانی شعیب منصور ہوری سن ایہہ سپر ہٹ ڈرامیاں وچوں اک سی۔ ڈرامے توں پہلاں سکرین اتے آندا سی آئی ایس پی آر دی پیش کش۔
ہن تسیں وی ویکھو کہ فوج نہ صرف جغرافیائی تے نظریاتی سرحداں دی راکھی کرے، صحافیاں تے ججاں اتے پہرے دیوے، نویں بستیاں بسائے سگوں تہاڈے لئی سٹریٹ ڈرامے وی تیار کرے۔ تسیں فیر ناشکرے دے ناشکرے۔
ڈرامے دا اک سین بوہت مشہور ہویا سی، جیہدے وچ اک نویں افسر نوں میس دا پرانا بیرا فوج وچ چاء پین دے سلیقا سکھاندا اے۔ ایہہ لیکچر فوج اندر تے باہر طبقاتی کشمکش تے ساڈے کھان پین دے فلسفے دا اک مکمل روڈ میپ طریقہ سی۔
بیرا صاحب نوں کہندا اے جد انسان جونیئر افسر ہوندا اے مثلاً کپتان دو چمچے چینی چاء وچ پاوے، میجر ڈیڑھ، کرنل اک چمچہ، برگیڈئیر ادھا تے جنرل صاحب نوں کوئی چینی نئیں۔
فوج توں باہر وی ساڈا نظام کجھ اجیہا ای اے۔ اوپر والے طبقے دے لوک شوگر فری کیک تے ڈارک چاکلیٹ کھاندے نیں۔ وچلے طبقے دے مٹھے لئی کھنڈ والی صحت جوگ دوجی شیواں مبتادل چیزاں لبھدے نیں۔ غریب مزدور طبقہ اک کپ وچ چار چمچے چینی وی پالیندا اے، کدھرے زردے دی دیگ پئی ہووے تے اوتھے پہنچ جاندا اے۔ گرمیاں وچ مٹھا شربت مانگدا اے، کدے نصیب کھل جاون تاں گڑ نال روٹی وی کھاندا اے۔
ہوسکدا اے کوئی سائنسی کارن نہ ہووے پر بندہ مزدور حیاتی دا ویلا تلخ توں تلخ ہوندا جارہیا اے، اوہ ایس تلخی دا توڑ ایس شے وچ لبھدا اے جیہڑی بازار وچ موجود اے تے اوہدی پہنچ وچ اے۔
وچلے طبقے دے بال جدوں روندے نیں تاں ماں پیو اوہناں ٹی وی یاں کمپیوٹر اتے کارٹون لادیندے نیں۔ ہتھ وچ لولی پوپ پھڑا دیندے نیں۔ اینہاں نعمتاں توں محروم غریب بالاں دیاں ماواں اوہناں نوں چپ کران لئی اوہناں دے مونہہ وچ کھنڈ دا ادھا چمچہ پادیندیاں نیں۔
جیویں وڈی عید اتے کئی بھرا تن دیہاڑ لئی قصائی بن جاندے نیں۔ انج ای بجٹ ویلے کئی موسمی ماہر معاشیات وی پیدا ہوجاندے نیں۔ اینہاں وچوں کجھ ایہہ کہندے پائے جاندے نیں عمران خان دا ایس بجٹ نال کوئی لینا دینا نئیں، بجٹ تاں کسے ہور نے بنایا اے۔
خان صاحب تاں چوراں لٹیریاں والے مشن اتے لگے نیں، جو وی اے اوہ اخیر ساڈے وزیراعظم تے نیں۔ قوم دے درد وچ ادھی راتیں زخمی شیر وانگ دھاڑ پیندے نیں۔ اوہناں توں بینتی اے کہ چوراں لٹیریاں نوں غریب دے بال دے مونہہ توں کھنڈ دا ادھا چمچہ نہ کھون دیو۔

اپنی رائے دا اظہار کرو