347

پیرانمبر66 تے ڈی چوک


سابق صدرتے آمرپرویزمشرف خلاف سنگین غداری کیس دا تفصیلی فیصلہ آگیا،خصوصی عدالت دے وڈے جج جسٹس سیٹھ وقاراپنے فیصلے وچ قانون نافذ کرن والے اداریاں نوں حکم دتا کہ اوہ جنرل پرویزمشرف نوں گرفتار کرن تے سزا اتے عملدرآمد کرن دی پوری کوشش کرن،جے جنرل مشرف مردہ حالت وچ ملے تاں اوہناں دی لاش اسلام آباد دے ڈی چوک لیا کے اوتھے تن دیہاڑے تیک لٹکائی جاوے۔سنگین غداری کیس چھ ورھے تیک چلیا، ملزم پرویزمشرف نوں اپنے دفاع دامکمل حق دتا گیا۔فیصلے وچ آکھیا گیا کہ ملزم مثالی سزا دا حق دار اے، اوس نوں ہر الزام وچ موت دی سزا دتی جاوے۔ جج نے فیصلے دے پیرا نمبر 66 وچ لاش نوں لیاکے ڈی چوک تن دیہاڑ لئی ٹنگن دا لکھ کے نویں بحث تے اعتراض دا موقع دے دتا گیا۔مشرف نوں سزا دین دے حق وچ دوجے جج جسٹس شاہد کریم نے جسٹس سیٹھ وقاردے لاش ڈی چوک   لٹکان دے حکم توں اختلاف کیتا۔فوج پہلاں ای فیصلے اتے تپی سی اوس اپنا غصہ فیر وکھایا، ڈی جی آئی ایس پی آر میجر جنرل آصف غفور آکھیا کہ  فوج ولوں 13 دسمبر دے مختصر فیصلے مگروں جیہڑا خدشہ دسیا گیا سی، اوہ صحیح ثابت ہو رہیا اے۔فیصلے وچ ورتے گئے الفاظ انسانیت، مذہب، تہذیب تے ساری قدراں دے خلاف نیں۔ ڈی جی آئی ایس پی آردسیا سابق فوجی صدر جنرل ریٹائرڈ پرویر مشرف خلاف خصوصی عدالت کے تفصیلی فیصلے مگروں پیدا صورتحال اتے وزیر اعظم عمران خان  تے آرمی چیف جنرل قمر جاوید باجوہ درمیان مشاورت ہوئی اے،جیہدے وچ کجھ اہم فیصلے کیتے گئے جیہدا وڈا اعلان حکومت کرے گی۔وفاقی حکومت ولوں وزیرقانون نسیم فروغ تے مشیر احتساب شہزاد اکبر آکھیا کہ فیصلہ لکھن والا جج ان فٹ اے،سرکار جوڈیشل کونسل  وچ ریفرنس دائر کرے گی‘ ایس دے نال سپریم کورٹ وچ فیصلے خلاف اپیل کیتی جاوے گی۔ 
سرکار ایہہ نئیں دس سکدی پئی، اوہ جنرل پرویز مشرف دی غداری ، آئین نوں توڑن دے الزام دے خلاف اے یاں جج دے ایس فیصلے دے خلاف نیں کہ اوہناں نوں ڈی چوک وچ ٹنگیا جاوے۔ ایہہ گل وی بھلھ گئے کہ ایس کیس وچ مدعی وفاقی سرکار اے۔
جج دی آبزرویشنزنے ثابت کردتا کہ ’اوہ دماغی طور اتے ان فٹ نیں۔ نااہل نیں۔ سینئر ججز توں اپیل اے کہ جسٹس وقار نوں کم کرن توں  روک دیون۔ وفاقی وزیر فواد چوہدری کہیا افتخار چوہدری دی بحالی مگروں اجیہے لوکیں  جج بن گئے جنہاں دی اہلیت تے علم سنجیدہ سوال نیں، اگ نال کھیڈن دے شوقین حضرات جانکاری نئیں کہ اوہ سڑ جاون گے۔  

اپنی رائے دا اظہار کرو