دنیا دے جمہوری ملکاں وچ سٹوڈنٹ یونین نوں سیاست دی نرسری سمجھیاجاندا اے جتھے اک پڑھے لکھے ماحول وچ اپنی گل کرنا تے خدشے اتے کھل کے اظہار کرنا تعلیمی اداریاں دی روایت رہی اے، مگر پاکستان وچ کئی دہائیاں توں ایہہ عمل رکیا ہویا اے۔
بی بی سی دی رپورٹ وچ دسیا گیا کہ 70 دی دہائی وچ جد جنرل ضیا الحق نے سٹوڈنٹس یونین اتے پابندی لادتی تاں اینہاں نرسریاں وچ نویں سیاسی قیادت دی تربیت دا عمل رک گیا تے جدوں انج ہوجاوے تاں سوال آندا اے کہ ملک وچ نویں قیادت تے پڑھے لکھے سیاستدان کتھوں آون گے؟ جدی پشتی سیاست دا خاتمہ کیویں ممکن ہوئے گا؟
جتھے نرسریاں بند ہوون اوتھے جنگل تاں اگدے نیں، باغ نہیں لگدے تے یونینز دے حامی اینہاں پابندیاں نوں کجھ اجیہی نگاہ نال ویکھ دے نیں، ایہو سوچ رکھن والے لیفٹ دا نظریہ رکھن والی سٹوڈنٹ تنظیماں نے یونینز اتے پابندی دے خاتمے تے پڈھیاراں دی سیاست لئی جدوجہد شروع کر رکھی اے۔
اس سلسلے وچ پروگریسو سٹوڈنٹس کلیکٹیو، سٹوڈنٹس ایکشن کمیٹی تے اوہناں نال شریک دوجی پڈھیاراں تنظیماں نے اپنی آواز بلند کرن لئی پاکستان دے مختلف شہراں وچ 29 نومبر نوں طلبہ یکجہتی مارچ دا اعلان کیتا اے۔
جد اینہاں پڈھیاراں توں پچھیا کہ ایس یکجہتی مارچ توں کیہ حاصل کرنا چاہندے او، تاں اوہناں بڑھی سدھی سانویں سوچ دا اظہار کیتا۔
لاہور دی اک تنظیم دی کارکن محبہ احمد دا آکھنا سی اوہ سیاست کرن دا حق دوبارہ حاصل کرنا چاہندے نیں۔ ’اسیں جمہوریت نوں سچے معنی وچ لیانا چاہندے آں، ایس ویلے جمہوریت تے سیاست صرف اک طبقے تک محدود اے۔ اسیں اوہدے کولوں کھو کے سیاست نوں لوکائی تیک لیانا چاہندے آں۔ ‘
پاکستان میں طلبہ لئی اپنے حق دی گل کرنا کوئی آسان نئیں ، ایس ہفتے دوران بلوچستان دے گورنر نے اک مراسلے وچ آکھیا کہ بلوچستان یونیورسٹی وچ کسے قسم دی سیاسی سرگرمیاں اتے پابندی عائد کردتی۔‘
بلوچستان یونیورسٹی دے رجسٹرار آکھیا ’یونیورسٹی سٹوڈنٹ یونینز دی بحالی دی تحریک توں خوفزدہ نئیں۔‘
دوجے پاسے تحریک دے آگو حسنین جمیل فریدی دی پنجاب یونیورسٹی توں ایم فل دی ڈگری کینسل ہون دی اطلاع آئی اے۔
سٹوڈنٹ یونینز اتے پابندی تاں جنرل ضیا الحق دے آمرانہ دور وچ لگی لیکن اس مگروں آون والی سولین سرکاراں وی یونیناں نوں اپنے دعویاں دے باوجود بحال نہ کرسکیاں۔
سنیئر صحافی تے ماضی دے سٹوڈنٹ لیڈر رحمان مطابق مارشل لا دے ایس آرڈیننس نوں ختم کرنا کوئی مشکل کم نئیں سی، لیکن ایسا نہ ہون کارن صرف سویلین حکومتاں دی بزدلی سی۔
اوہناں دا کہنا سی کہ سٹوڈنٹ یونینز اتے پابندی دا سبھ توں وڈا نقصان ایہہ ہویا کہ ایس کلچر توں تربیت لے کے نکلن والے پڈھیارجیہڑے اگے چل کے ملکی سیاست دا حصہ بن دے سن، اوہ سبھ مُک گیا۔
دوجے پاسے تحریک وچ شریک پڈھیاراں دا کہنا اے کہ حکام ایس لئی طلبہ یونینز تے تنظیماں خلاف نیں کیوں جے اوہناں نوں خوف اے جے پڈھیاراں نوں سیاست دا حق دتا گیا تاں فیر اوہناں دا اختیار خطرے وچ پے جائے گا۔ ’ایہو خوف کئی دہائیاں توں پاکستان دی سیاست وچ نواں خون شامل ہوون دی راہ وچ رکاوٹ بنیا ہویا اے۔
348
