پاکستان کرکٹ ٹیم وڈا مایوس کیتا، اک وار فیر ورلڈکپ دے میچ وچ بھارت خلاف ہارگئی۔ ساری منصوبہ بندی ، مشورے، تیاریاں ،صلاحاواں سبھ اک پاسے رہ گئیاں۔
پہلاں کپتان سرفراز احمد ٹاس جت کے بھارت نوں کھیڈن دا سدا دتا، جس دا مطلب سی ساڈی بلے بازی بھارت توں چنگی اے جیہڑی مگروں آکے ٹیچا پورا کرسکدی۔ ایہہ بھرم وی اک وار فیر ٹٹ گیا۔
پنج کھڈاری آوٹ ہوئے تاں بھارت پنجا اووراں وچ 337 رنزاں بنائیاں۔
روہت شرما 140 دی ستھری اننگز کھیڈی، اوہناں دے نال راہول وی 57 سکور کیتا۔ کپتان ورات کوہلی چنگے کھیڈ دا مظاہرہ کیتا، اوہناں 77 رنزاں دی اننگز کھیڈی۔
محمدعامر اک وار فیر ستھری بولنگ کیتی اوہ تن وکٹاں لین وچ کامیاب ہوگئے، اوہناں دنیا دے نمبر اک بلے باز ورات کوہلی نوں آوٹ کیتا۔ ہالے تائیں ورلڈ کپ دے سبھ توں زیادہ وکٹاں 13 وی اوہناں دے حصے آئیاں نیں۔
پاکستان ٹیم نے جواب وچ کوئی چنگی شروعات نہ کیتی، گھٹ تجربہ کار امام الحق اک وار فیر گیند نال بلے دی ملاقات دے چکر وچ رہے، اوہناں نوں گیند گھٹ ای وکھائی دتی، 13 دے ٹوٹل اتے اوہناں واپسی دا آہر کیتا۔ بابراعظم نے فخر زمان نال رل کے اک سو رنزاں دے ساجھے داری نبھائی، بابر 48 سکوار اتے آوٹ کیہ ہوئے، فیر چل سو چل لگ گیا۔ فخر زمان وی آکھیا کھلوئیں میں وی آرہیا آں۔ اوہ 61 رنز دے ٹرگئے۔
کپتان سرفراز جنہاں بارے شاید غلط تعارف کرایا جاندا اے پئی اوہ وکٹ کیپر نال بلے باز نیں انج حقیقت نئیں اے، اسیں اوہناں نال بلے بازی دی آس لالیندے آں جدکے سرفراز کدے وڈا سکور نئیں کیتا۔ نرا کپتان ہوون پاروں اوس نوں بلے بازی دا تمغہ لادتا جاندا اے۔ اوہ وچارے اپنی اوقات مطابق ای کھیڈ وکھاسکدے نیں۔ جے کسے سیانے آکھ دتا سی پئی اخیرلے گیند تیک مقابلہ کرنا اے تاں آسٹریلیا خلاف وی سرفراز ایہہ سدھر پوری نہ کرسکے، بھارت خلاف وڈے مقابلے وچ وی اوہ کوئِ تجربہ کاری نہ وکھاسکے، ہوندا تےوکھاندے۔
تجربہ کار وی کیہ پچھے رہندے حفیظ تے شعیب ملک وی دعوے اک پاسے رکھے تے آن جان ای کیتی۔ چلو اک وار فیر سئی۔ کیہ کرئی سانوں تہاڈے نال پیار ای بوہت اے، دوجے ساڈا کپتان دھوکہ نئیں دیندا، ایہہ کیہڑا ملک دا کپتان اے جدے نال اسیں گلے شکوے کرنے ہن۔ ایہہ انج ای ورلڈکپ دے مقابلیاں وچ مونہہ کھول کے اباسیاں لیندا رہوے گا تے ساڈے مونہہ چڑھاندار رہوے گا۔
انضمام الحق وی خوش رہن جنہاں قسم کھادی اے پئی اپنے بھترئیے نوں ساری میچ کھڈانے نیں بھانویں اوس کولوں کھیڈ ہووے یاں نہ۔ دوجے اسیں مکی آرتھر دی ذھانت توں فیدا چکدے رہواں گے۔
گل بھارت توں ہارن دی نئیں، کھیڈ نئیں سگوں کسے وی کم نوں سمجھن دی اے، سانوں ہورے کوئی عقل مت نئیں پئی ٹیم نوں کیویں چلانا اے یاں ملک نوں، یاں کسے وی کم نوں کیویں کرنا اے۔ اسیں سبھے انھیاں ٹکراں کیوں ماردے ہاں۔
ورات کوہلی نے 222 میچاں وچ 11 ہزار سکوراں بناون دا دھونی دا ریکارڈ وی توڑدتا۔ وڈے کھڈاری کوئی نہ کوئی ریکارڈ بنا یا توڑدے نیں۔ کجھ نرا کرکٹ دے چاہیواناں دا مان ای توڑدے نیں۔ کوئی آس نہ چھڈو کدے ایہناں دا وی دن آئے گا، شاید ساڈی کھڈاری وی کوئی منصوبہ بندی کرن گے،
405
