پاکستان دے بال جسم وچ لہو گھٹ ہوون پاروں سوکے دا شکار ہوجاندے نیں، صحت دے عالمی بنک دی رپورٹ وچ آکھیا گیا پاکستان نکی عمردے بالاں سٹنٹنگ دا روگ سیونک وانگ چمڑ رہیا اے. ایس روگ دے شکار بالاں دی گنتی پاکستان وچ سبھ توں ودھ اے.
رپورٹ وچ اندرون سندھ ٹھٹھہ توں 60 میل دور بپنڈ دی وسنیک حاکم زادی بارے دسیا جیدے گھر دو مہینے پہلاں بال ہویا ڈاکٹراں دسیا اوس بال نوں چٹے لہو دی چار بوتلاں لگن گئیاں اوہناں کول پیسے نئیں سن نری دو بوتلاں لواسکے. ڈاکٹراں دسیا بال جمن ویلے ای ڈاھڈا ماڑا سی. ایہدے لہو دے گھٹ ہوون پاروں سٹنٹنگ دا روگ لگ گیا. پہلاں بال سکڑدا اے فیر اوہدے پٹھے ماڑے پے جاندے تے وزن گھٹ جاندا اے.اک زنانی زلیخا دا بال تن ورھیاں دا ہوگیا اوس دا وزن وی گھٹ اے اوہ دوجے بالاں وانگ ناں ہسدا ناں ای کھڈدا اے.ڈاکٹراں دا آکھنا اے کے ماواں وی ماڑیاں ہوندیاں نیں اوہ اپنے بالاں نوں ددھ نئیں پیا سکدیاں جیہدے کارن اوہناں دے بالاں وچ وی سوکا پے جاندا اے.عالمی بنک دے صحت دے ماہراں دا آکھنا اے کہ سٹنٹنگ صحت تے نیوٹریشن دا مسئلہ نئیں بلکہ معاشی وی اے. ایہدا تعلق پیداوار نال وی ہوندا اے. کیوں جے جیہڑا بال اجیہے ماحول وچ جمدا اے جتھے ملازمتاں دے موقعے گھٹ ہوندے نیں. اوہدے لئی صحت مند حیاتی گزارنا اوکھا ہوجاندا اے.
پاکستان نوں معاشی ترقی لئی انساناں اتے سرمایہ کاری کرنا ہووے گی۔ اوہناں دی صحت۔ روٹی تعلیم تے ہنر دی صلاحیتاں ودھانیاں ہوون گئیاں۔
432
