تحریک انصاف سرکار سانبھن توں پہلاں اعلان کیتا سی کہ اوہ گل بات دی آزادی دے حق دا بھرواں تحفظ کرے گی آزادی صحافت اوس دے منشور دا اہم حصہ اے۔
ٹی وی چینلز اتے سرکار مخالف جماعتاں نوں خاص کر نون لیگ تے پیپلزپارٹی دے آگوواں دے انٹرویو اوہناں دے جلسے روک دتے جاندے رہے نیں۔ پرنٹ میڈیا اتے لکھاریاں دے کالم بند کردتے گئے۔
پشتون تحفظ موومنٹ والیاں دی خبر دینا وی ناممکن ہوگیا اے۔ سرکار دا موقف باربار اوہو رہیا پئی اساں اظہار دی آزادی تے صحافت دی آزادی اتے پک رکھدے آں۔ وزیراں تے صلاح کاراں دے رویئے سخت رہے اوہناں جدوں وی ایس مسئلے اتے گل کیتی اوکھا جواب ملیا۔
تازی مثال چینل 24 وچ نجم سیٹھی نوں آف ایئر کردتا گیا۔ چینل انتظامیہ دا آکھنا اے فی الحال کوئی صورتحال نئیں جیہدے کارن پروگرام شروع کیتا جاوے۔
بی بی سی نال گل کردیاں نجم سیٹھی دسیا کہ چینل انتظامیہ نوں پروگرام توں اگلے دیہاڑ ان جان بندیاں ولوں پیغام آیا پئی کشمیر معاملے اتے کورکمانڈر میٹنگ تے آئی ایس پی آر دی پریس ریلیز بارے نجم سیٹھی جو کجھ کہیا اوہ بدمزہ سی۔
نجم سیٹھی دسیاکہ ایہہ کوئی باضابطہ نوٹس نئیں سی پیغام دیون والے انتظامیہ توں منگ کیتی ایہہ پروگرام ختم کردیو تے نجم سیٹھی نوں فارغ کردیو۔
انتظامیہ نوں معاملے دی سنیگنی دا اندازہ سی، نجم سیٹھی اوہناں نوں استعفے دی پیشکش کردتی۔ تاں جے چینل کسے ہور مصیبت وچ نہ پے جاوے۔
بی بی سی آئی ایس پی آر نال رابطہ کیتا مگر کوئی جواب نئیں ملیا۔
پیمرا دے ترجمان دا موقف جانن لئی وی سوال گھلے گئے مگر اوہناں کوئی جواب نئیں دتا۔
نجم سیٹھی نوں وزیراعظم عمران خان والوں ذاتی طور اتے وی ہتک عزت دا نوٹس ملیا اے جیہدے اتے اسلام آباد دی عدالت وچ شنوائی ہورہی اے۔
بی بی سی رپورٹ وچ دسیاکہ مریم نواز دے گرفتاری توں پہلاں جلسے وی چینلز پیمرا دے اک حکم اتے نئیں وکھائے۔ تن چینل بند کردتے گئے۔
کوئی نوٹس نئیں گھلیا جاندا اک واٹس ایپ پیغام اُتے چینل بند ہوجاندا اے۔
سوال اے پئی چینل اتے کوئی گل سیاستدان غلط کردا اے اوس نوں عدالتاں پچھن لئی بیٹھیاں نیں۔ جے چینل دا اینکر یا انتظامیہ غلط کردی اے اوس دا طریقہ کار متھیا اے۔ نوٹس دیو فیر کارروائی کرو۔
گمنام انجان فون تے واٹس ایپ اتے میڈیا نوں کنٹرول کرنا ماضی دے ڈکٹیٹراں دی یاد دوا دیندا اے۔ ایہہ سبھ بدمزہ کردیندا اے
620
