گرمی دی لہر جاری، لوکاں دا بُرا حال، عید تَتی رہسی

وزیرآباد/گوجرانوالہ (سجن رپورٹ) پورے ملک چ ڈاڈھی گرمی دی لہر جاری، صوبہ پنجاب سَنے خیبر پختونخوا دے میدانی علاقے تے سندھ سَاڑ دین آلی گرمی دی لپیٹ چ نیں۔ گرمی نے لوکاں نوں بے حال کر چھڈیائے تے اوہ گھراں اندر لُک گئے نیں، روزے داراں دا حال چوکھا مندا اے۔
دوجے پاسے محکمہ صحت پنجاب نے ہیٹ ویو الرٹ جاری کر دِتائے، ڈی جی ہیلتھ طرفوں جاری بیان چ کہیا گیا اے کہ شدید گرمی نال بچے تے بُڈھے ہیٹ سٹروک دا شکار ہو سکدے نیں، سر پِیڑ، چکر، بلڈ پریشر تے غنودگی ہیٹ سٹروک دی نشانیاں ہو سکدیاں ہین ایس لئی لوک دُھوپے نکلن وپلے سر کپڑے نال کَج کے رکھن۔ محکمہ موسمیات موجب لاہور، فیصل آباد، ملتان، گوجرانولہ تے وزیرآبا چ اَج چوکھے توں چوکھا درجہ حرارت 45 توں 47، اسلام آباد 41، پشاور 42، سکھر 49 جد کہ کراچی چ 37 ڈگری سینٹی گریڈ تائیں ہون دا امکان اے۔ چیف میٹرولوجسٹ کراچی عبدالرشید دا کہنا اے کہ گرمی دی موجودہ لہر عید اُتے وی برقرار رہسی۔ اگلے کُجھ دیہاڑ گرمی ہور وَدھے گی تے تتیاں ہواواں جُھلن گِیاں۔ عید دے پہلے 2 دیہاڑ موسم گرم تے سُکا رہوے گا۔