مشرف دا کٹا، ٹماٹر تے چودھری شجاعت دا مشورہ

مسلم لیگ ق دے آگو چوہدری شجاعت حسین نے آکھیا اے کہ پرویز مشرف والا کٹا کھولن دا کیہ فائدہ؟ ایہدے نال لوکاں نوں کوئی فائدہ نہیں ہووے گا تے ناں ای مہنگائی، بے روزگاری تے دوجیاں خرابیاں دا خاتمہ ہووے گا۔
انہوں نے کہیا کہ پرویز مشرف دا کیس 5 سال توں چل رہیا اے تے ہور 5 سال تیک چلدا رہے گا، فیر وی لوکاں نوں ایس توں کوئی فیدہ نئیں اپڑن والا۔ ٹماٹر جس بھاؤ ہن مل رہے نیں کیہ 5 سال مگروں ایہناں حرکتاں نال سستے ہو جاون گے؟ الزام لاون دی تھان سبھ مل کے ملک نوں دلدل وچوں کڈھئے تے پچھلیاں گلاں بھلا کے ملک دے فیدے وچ کم کرن والیاں دا ساتھ دتا جاوے۔
چودھری شجاعت نے سبھے جماعتاں توں اپیل کیتی پئی اوہ ملکی حالات ٹھیک کرن لئی، اگے ودھن تے رل کے کوئی طریقے لبھن۔