344

مسئلہ کشمیر اتے امریکی صدر ٹرمپ دا یوٹرن

امریکا دے صدر ڈونلڈ ٹرمپ نے آکھیا اے کہ پاکستان تے بھارت آپس وچ مسئلہ کشمیر نوں حل کر سکدے نیں، امریکا دوہاں ملکاں دے مدد کرن نوں تیار اے۔
برطانوی خبر رساں ادارے رائٹرز دی رپورٹ مطابق پیرس وچ جی-7 کانفرنس دے موقعے اتے صدر ڈونلڈ ٹرمپ تے بھارتی وزیراعظم نریندر مودی وچکار اک وکھری ملاقات ہوئی۔
پاکستانی وزیراعظم عمران خان دے دورہ امریکا دوران صدر ٹرمپ نے مسئلہ کشمیر حل کروان لئی پاکستان تے بھارت وچکار ثالثی دی پیشکش کیتی سی۔
ادھر فرانس وچ نریندر مودی نال ملاقات وچ وی امریکا دے صدر نے کشمیر دی صورتحال دا ذکر کیتا۔
امریکی صدر نے ملاقات بارے دسیا کہ بھارتی وزیر اعظم نے اوہناں نوں آکھیا کہ ’کشمیر ساڈے کنٹرول وچ اے‘۔
بھارتی خبر رساں ادارے اے این آئی مطابق نریندر مودی دا کہنا سی کہ نویں دلی تے اسلام آباد وچکار سارے دوپاسے مسئلے نیں، ایس پاروں اوہ کسے دوجے ملک نوں اینہاں وچ شریک نئیں بناونا چاہندے۔ ‘
مودی دا ہور آکھنا سی کہ بھارت تے پاکستان 1947 توں پہلاں اکٹھے سن تے آس پئی اسیں ہن وی اکٹھے بیٹھ کے اپنے سارے مسئلے حل کرسکدے آں۔

اپنی رائے دا اظہار کرو