فوج دے ترجمان دی وضاحت، مولانا دا جواب

پاک فوج دے ترجمان میجر جنرل آصف غفور دا کہنا اے کہ اپوزیشن نوں ایہہ گل سمجھن دی لوڑ اے کہ فوج غیرجانبدار ادارہ اے۔ اک ٹی وی نال گل کردیاں ڈائریکٹر جنرل انٹرسروسز پبلک ریلیشنز (ڈی جی آئی ایس پی آر) میجر جنرل آصف غفور نے کہیا کہ مولانا فضل الرحمان اپنی شکایتاں متعلقہ اداریاں کول لے کے جاون ، سڑکاں اتے الزام تراشی نال مسئلے حل نئیں ہوندے۔
مولانا فضل الرحمان سینیئر سیاستدان نیں جیہڑی گل کہندے نیں اوہناں نوں معلوم ہوندا اے کیہ کہہ رہے نیں، پہلی گل اوہناں توں ایہہ پچھن والی اے کہ اوہ کہدی گل کررہے نیں،اوہناں دا اشارہ الیکشن کمیشن،عدالتاں یا فوج ول اے؟ جے اوہناں فوج دی گل کیتی اے تاں اپوزیشن دے سمجھن دی گل اے پئی فوج نرپکھ ادارہ اے، اسیں آئین تے قنون دی عمل داری اتے یقین رکھدے آں۔
ڈی جی آئی ایس پی آر دا کہنا سی کہ فوج دی حمایت اک جمہوری منتخب حکومت نال ہوندی اے، کسے اک جماعت لئی نہیں، جے الیکشن دی شفافیت متعلق شکایت اے تاں ایس نوں متعلقہ ادارے کول لے جانا چاہیدا اے۔
ایس بیان مگروں مولانا فضل الرحمان دوجے سرکار مخالف لیڈراں نال مل کے پریس کانفرنس کیتی جیہدے وچ اک وار فیر آکھیا کہ فوج دے تعلقات عامہ دے محکمے ولوں ایہہ بیان نئیں آونا چاہیدا سی، کیوں جے اسیں اداریاں نوں غیر سیاسی ویکھنا چاہندے آں، ایہہ بیان دے کہ غیرجانبداری نئیں رکھی، اسیں نرپکھ فوج دے حامی آں۔