شمالی وزیرستان وچ ہور 5 لاشاں ملیاں۔ اک فوجی شہید ہو گیا

خیبر پختونخوا دے قبائلی ضلعے شمالی وزیرستان وچ 5 لاشاں ملیاں نیں جہناں نوں گولیاں مار کے قتل کیتا گیا سی۔ آئی ایس پی آر موجب ایہہ لاشاں اتوار والے دیہاڑے بویا دے علاقے وچ فوج دی خرقمر چیک پوسٹ تے مرن والیاں توں وکھ نیں۔
آئی ایس پی آر نے ایہہ وی دسیا اے بئی کل دی جھڑپ وچ زخمی ہون والا ایک فوجی گل خان شہید ہو گیا اے۔ گل خان ضلع خیبر دے علاقے جمرود دے علاقے وچ رہن والا سی تے اوس دا تعلق کوکی خیل قبیلے نال اے تے اوہ تن بالاں دا پیو سی۔
اتوار نوں ایس علاقے وچ پاکستانی فوجیاں تے پشتون تحفظ موومنٹ دے کارکناں وچکار اک جھڑپ ہوئی سی۔ جیہدے وچ تن بندے ہلاک تے پنج فوجیاں سنے 15 بندے زخمی ہوگئے سن۔
ایس جھڑپ تے قومی اسمبلی دے ممبر علی وزیر سنے کئیں بندیاں نوں گرفتار کر لیا گیا اے تے پرچہ کٹ کے تفتیش شروع کر دتی گئی اے۔ علی وزیر نوں پیر والے دیہاڑے دہشت گردی مکاون والی عدالت وچ پیش کر کے 8 دناں دا ریمانڈ لے لیا گیا اے۔ فاٹا توں دوجے ممبر قومی اسمبلی محسن داوڑ اپنے دوجے ساتھیاں سنے لاپتہ نیں۔ آکھیا جا رہیا اے بئی اوہ نسے ہوئے نیں۔ ایہہ وی دسیا جا رہیا اے بئی پی ٹی ایم دی رہنما گلہ لئی اسماعیل ملک توں باہر نسن دی کوشش کر رہئی اے۔

ہیومین رائٹس کمیشن آف پاکستان دے سربراہ ڈاکٹر مہدی حسن نے منگ کیتی اے بئی سرکار پی ٹی ایم دے گرفتار لوکاں نوں رہا کرے تے ایس واقعے دی تحقیقات لئی پارلیمانی کمیشن بنایا جاوے۔
ملک بھر دے سیاسی رہنماواں پیپلز پارٹی دے چیرمین بلاول بھٹو، پاکستان مسلم لیگ نون دی لیڈر مریم نواز نے وی منگ کیتی اے بئی ایس مسئلے نوں گل بات راہیں حل کیتا جاوے۔
پی ٹی ایم دے لیڈراں دی گرفتاری دے خلاف ملک بھر وچ احتجاج کیتا جا رہیا اے تے اوہناں دی رہائی دی منگ کیتی جا رہئی اے۔