419

کارڈ چوری الزام وچ ہلاکت، 3 پلس افسراں خلاف مقدمہ

رحیم یار خان وچ اے ٹی ایم کارڈ چوری الزام وچ پھڑے جاون والے صلاح الدین دی پلس حراست وچ ہلاکت اتے میڈیا رپورٹاں مگروں ہر پاسے رولا پے گیا، وڈے پلس افسراں تھانے دے ایس ایچ او نوں معطل کردتا تے مرن والے دے پیودی دی درخاست اتے کارروائی کردیاں تن اہلکاراں خلاف پرچہ کٹ دتا۔
ایس توں پہلاں رحیم یارخان پولیس مطابق دوران حراست صلاح الدین ایوبی دی حالت اکوسار وگڑگئی تے اوس نوں ہسپتال لے جایا گیا،مگر اوس راہ وچ ای دم دے دتا۔
اے ٹی ایم توں کارڈ چوری دے الزام وچ پھڑیا بندہ کہیا جاندا اے پئی پاگلاں ورگیاں حرکتاں کررہیا سی، ٹی وی چینلاں اتے وی اوس گلاں عجیب وغریب کیتیاں، پلس اوس نوں حالت وگڑن اتے شیخ زید میڈیکل کالج ہسپتال لے گئی، جتھے ڈاکٹراں دسیا پئی اور مرگیا اے۔
گوجرانوالہ دے رہائشی صلاح الدین ایوبی نے فیصل آباد وچ وی کارروائی کیتی سی، اوس نوں رحیم یار خان توں اے ٹی ایم بوتھ دے باہروں لوکاں پھڑیا، اوتھے اوس نوں شہریاں تے گارڈ رل کے کٹیا، فیر پلس دے حوالے کردتا جتھے اوس گونگا بنیا رہیا، جدوں پلس رجھ ماریا تاں اوس زبان کھول دتی، تاں جو کجھ اوس نوں سمجھ لگیا دسیا۔
صلاح الدین دے والد دسیا پئی اوس دے منڈے دی ذھنی حالت نکے ہوندے توں انج سی، لہور وچ علاج وی کرایا مگر اوہ ٹھیک نہ ہوسکیا، اوس دے پاگل پن کارن کئی وار پلس اوس نوں پھڑچکی سکی، اک وار وڈے پلس افسر وی اوہدی حالت نوں ٹھیک نئیں آکھیا سی، والد دا کہنا سی جے اوہ پھڑیا گیا سی فیر اوس نوں ایس بے دردی نال مارن دی کیہ لوڑ سی۔ مقدمہ درج کراون مگروں اوہ اپنے منڈے دی لاش گوجرانوالہ لے گیا۔

اپنی رائے دا اظہار کرو