لہور( شاہ جی) شاہ محمود قریشی دی وکھری لائن۔۔۔۔۔ وزیر خارجہ شاہ محمود قریشی ایہناں دناں وچ کھل کے کھیڈدے نظر آرہے نیں۔ اوہناں سرکاری ٹیم دی صلاح توں ہٹ اک واری فیر انکم سپورٹ پروگرام توں بینظیر بھٹو دا ناں کڈھن دی مخالفت کیتی اے۔ شاہ محمود قریشی نے حکمران پارٹی وچ اک نواں پنڈورا باکس کھول دتا اے، اوہناں سرکاری اجلاساں وچ جہانگیر ترین دی موجودگی دی کھل کے مخالفت کردتی۔ شاہ محمود ہوراں آکھیا بئی اہم سرکاری تے پارٹی بیٹھکاں وچ جہانگیر ترین دا رلنا سپریم کورٹ دی حکم دی خلاف ورزی اے تےایہدے نال مخالف سیاسی جماعتاں نوں گل کرن دا موقع وی ملدا اے۔ شاہ محمود قریشی تے گورنر سرور لہور وچ اکٹھے نظر آئے، جو جہانگیر ترین خلاف اک مٹھ ہوون دا اشارہ اے۔ ایس توں پہلاں ایہہ تریویں لیڈر اپنے اپنے گروپ دی سیاست کردے سن۔ وزیراعظم عمران خان ولوں جہانگیر ترین نوں بوہتی لفٹ کران دے خلاف ہن دونویں اک پیج اتے آرہے نیں۔ اندر دی گل دسن والے ایہہ وی دسدے نیں بئی، حکومت دے کپتان دی تبدیلی دی نوبت آئی تے ایس سیٹ اپ نوں برقرار رکھن دی صورت وچ شاہ محمود قریشی نویں کپتان ہوسکدے نیں، جے کھل کے آکھیے تے شاہ محمود قریشی نوں عمران خان دے متبادل دے طور تے تیار کیتا جارہیا اے، کیوں جے۔۔۔ جو کح ہورہیا اے، اوہدے وچ عمران خان دی قوت برداشت کسے ویلے وی مک سکدی اے۔
شاہ محمود قریشی دے بیان دے خلاف کئیں وزیر پڑ وچ اتر آئے۔ جہلم دے چودھری فواد جیہڑے پی ٹی وی دے ایم ڈی دے مسلے تے وزیر اعظم نال چنگے سانگے نہیں سن رکھ سک رہئے سن وی لنگوٹا کس کے جہانگیر ترین دی حمائت وچ آ گئے۔ اوہناں اکھیا بئی جہانگیر ترین وزیر اعظم عمران خان دے سدن اتے کابینہ دی بیٹھک وچ آئے سن۔ کجھ دوجے وزیراں جنہاں وچ کراچی دا واڈا وی شامل اے نے ترین دی حمائت کیتی اے پر چودھری فواد دی حمائت ایس لئی بوہتی اہم اے بئی اوہ سرکار دے بلار نیں تے اوہناں دی کیتی گل سرکار دی گل سمجھی جاندی اے۔
دوجے پاسے چودھری فواد وزیر اعظم عمران دے پرانے سنگی نعیم الحق دے نال بھڑ دے آ رہئے سن۔ چودھری فواد دے بارے عمران خان دا کہنا اے بئی اوہ پنجاب دے وزیر اعلی عثمان بزادر دے خلاف ٹی وی اینکراں کولوں گلاں کراندے نیں۔
500
