پشاور (سجن رپورٹ) وزیراعلیٰ خیبر پختونخوا محمود خان نے شمالی وزیرستان دے علاقے خڑ کمر واقعے توں متاثر ہوئے لوکاں لئی امدادی پیکج دا اعلان کیتا اے۔ آپنے بیان راہیں وزیر اعلیٰ نے واقعے چ جاں بحق لوکاں لئی فی بندہ 25 لَکھ روپئے تے زخمیاں لئی فی بندہ 10 لَکھ روپئے دین دا اعلان کر دیاں آکھیا کہ پختوناں دے ناں تے سیاست کرن والے پختون قوم نوں اِک واری فیر جنگ وَل دَھکن دا جتن کر رہے نیں۔اوہناں آکھیا کہ عوام، پاک فوج تے سیکیورٹی اداریاں دی قربانیاں پاروں امن ہویا اے تے ایہہ امن کسے وی مُل اَپر قائم رکھیا جاسی۔
چیتے رہوے کہ “26 مئی نوں شمالی وزیرستان چ ‘بویا سیکیورٹی چیک پوسٹ’ اُتے اِک جتھے نے حملہ کیتا سی، جتھے دی آگوائی قومی اسمبلی دے ارکان محسن جاوید داوڑ تے علی وزیر کر رہے سن جیہڑے دوویں ایس ویلے گرفتار ہین۔ ایس حملے دے سِٹے چ 5 فوجی زخمی ہوئے سن۔ آئی ایس پی آر موجب خڑ کمر چیک پوسٹ اُتے حملے دا ٹیچا واقعے توں اِک دیہاڑ پہلے گرفتار کیتے گئے مبینہ دہشت گرداں دے سہولت کاراں نوں چھڑوان لئی دباؤ پانا سی۔ بیان چ کہیا گیا سی کہ چیک پوسٹ اَپر موجود اہلکاروں اُتے سِدھی فائرنگ کیتی گئی جیہدے تے اہلکاراں آپنی راکھی لئی جوابی فائرنگ کیتی۔ سِدھی فائرنگ کارن 5 اہلکار زخمی ہوئے جد کہ جوابی کارروائی چ 3 بندے مارے گئے تے 10 زخمی ہوئے۔ اگلے دیہاڑ فوج دا اِک جوان زخماں توں چُور ہو کے شہید ہوگیا سی۔”
(ڈان نیوز دے شکرئیے نال)
حسین نقی صاحب دے سجن وچ ایہہ پڑھ کے افسوس ہویا کہ 26 مئی نوں شمالی وزیرستان دی ایک چیک پوسٹ تے پختون تحفظموومنٹ دے حمایتیاں تے کارکناں دے قتلام دا ذمہ الٹا اوہناں دے آگوواں تے ہی لایا جا رہیا اے. ایس سانحہ دی ابتدائی رپورٹاں توں ہی واضح سی کہ گولی فوج نے تےبلااشتعال چلائی سی تے لوکاں جواب وچ وی کوئی فائرنگ نہیں کیتی سی.
خبر دا ایہہ حصہ جھوٹ اے: “چیتے رہوے کہ 26 مئی نوں شمالی وزیرستان چ ‘بویا سیکیورٹی چیک پوسٹ’ اُتے اِک جتھے نے حملہ کیتا سی، جتھے دی آگوائی قومی اسمبلی دے ارکان محسن جاوید داوڑ تے علی وزیر کر رہے سن جیہڑے دوویں ایس ویلے گرفتار ہین۔ ایس حملے دے سِٹے چ 5 فوجی زخمی ہوئے سن۔”
اخبار کسی واقعہ دے بارے مکمل چھان بین کر کے حقائق اپنے پڑھن والے دے گے رکھدا اے تے اخبار ہوندا اے. افواہ یا طاقت والے دھڑے دا دسیا ہویا جھوٹ خبر بنا کے لوکاں اگے رکھ دینا بددیانتی اے.
خبر دا ایہہ والا حصہ آئی ایس پی آر دا بیان اے دوجا صوبائی سرکار آپ من لیائے