413

بھارت وچ مسلماناں تے ہندوواں وچکار کھچا ودھ گیا

سری نگر( سجن رپورٹ) بھارت دے ملے کشمیر دے علاقے پلواما وچ بم دھماکے وچ چھیالی بھارتی فوجیاں دی موت پچھوں ایتھے وسدے مسلماناں تے ہندوواں وچکار کھچا ودھ گیا اے۔
ہندوواں نے جموں تے کشمیر دے کجھ علاقیاں وچ مسلماناں دی جائیداداں تے بساں ٹرکاں نوں اگ لائی،
جموں تے کشمیر توں وکھ وی کشمیری مسلماناں نوں ڈرایا تے تنگ کیتا جا رہیا اے۔ ہریانہ، پنجاب، چھتیس گڑھ تے دوجی ریاستاں وچ پڑھن والے طالب علماں دسیا بئی اوہناں نوں دھمکیاں دتیاں جا رہیاں نیں تے کشمیر واپس جاون دا اکھیا جا رہیا اے۔
دوجے پاسے کشمیر وچ لوکاں نے وکھالے کیتے تے منگ کیتی بئی کشمیری جواناں نوں بے سبب پھڑن تے تنگ کرن دی راہ بند کیتی جائے۔ سری نگر وچ دوکانداراں تے تاجراں نے اپنیاں دکاناں تے کاروبار بند رکھے۔
جیہڑے بھارتی فوجی دھماکے وچ مرے اوہناں وچ راجوری دے علاقے دا اک مسلمان جوان نصیر احمد وی سی۔ نصیر دے گھر کسے ہندو آگو نے آون دی تھاں مسلماناں اتے دوش لاون تے ٹل لایا ہوئیا اے۔
اجے چھیالی بھارتی فوجیاں دی موت دا کم ٹھنڈا وی نہیں پیا تے ہفتے والے دیہاڑے لائن آف کنٹرول دے نیڑے نوشہرہ سیکٹر وچ بھارتی فوج دا اک میجر تے سپاہی بارودی سرنگ دے دھماکے وچ مارے گئے نیں۔

اپنی رائے دا اظہار کرو