پی پی پی چیئرمین بلاول بھٹو زرداری نے متحدہ قومی موومنٹ پاکستان (ایم کیو ایم) نوں وزیراعظم عمران خان دی حکومت گران وچ ساتھ دیوں بدلے سندھ وچ وزارتاں دی پیشکش کیتی سی۔
پیپلز پارٹی رہنما قمر زمان کائرہ دا کہنا اے کہ اوہناں دی جماعت سرکار ڈھان لئی لوکاں دی وفاداریاں نئیں بدل رہے، سگوں وفاقی حکومت دی اتحادی جماعتاں آپ سرکار توں ناراض نیں۔
دوجے پاسے ایم کیو ایم آگو خواجہ اظہارالحق نے جواب دتا کہ وفاقی سرکار متحدہ نال کیتے وعدے پورے کرے، دوجے پاسے پیپلزپارٹی نوں وی سوچنا ہووے گا پئی اوس متحدہ نال کیہ رویہ رکھیا، سانوں نری وزارتاں نئیں چاہیدیاں سگوں کراچی تے سندھ دے شہری علاقیاں وچ کم ہونے چاہیدے نیں۔
فردوس عاشق اعوان نے بلاول دی پیشکش اتے متحدہ دے جواب مگروں آکھیا کہ سرکار ڈھان لئی ایم کیو ایم نوں سدا دینا ظاہر کردا اے کہ بلاول بھٹو دی اقتدار لئی خواہش زبان اتے آہی گئی اے۔
اپنے ٹویٹ وچ اوہناں دا کہنا سی کہ سیاست دے میدان وچ ناکامی اتے مخالف چور دروازہ لبھ رہے نیں، اوہناں دی کالی کرتوتاں کارن لوکاں اوہناں نال سیاسی اتحاد توڑیا اے جدکہ وزیراعظم نے قوم نوں جوڑ توڑ تے لین دین دی سیاست توں پاک کردتا اے۔
301
