340

کشمیر وچ حالات ٹھیک نیں فیر سانوں کیوں روکیا، اپوزیشن

نویں دلی، دی ہندو، این ڈی ٹی وی رپورٹ

کانگرس آگو راہول گاندھی تے اپوزیشن جماعتاں دے 11 آگوواں دا وفد اج نویں دلی توں سرینگر جہاز راہیں اپڑیا، سیکیورٹی فورسز نے اوہناں نوں طیارے توں باہر نئیں نکلن دتا، ریاستی سرکار دے اک بیان وچ آکھیا گیا کہ لوکاں دی حفاظت لئی سرکار پیر پٹے نیں، جنہاں وچ کرفیو، ٹیلی فون تے دوجے سارے رابطے دے ذریعے بند کرنا شامل اے، ایس دا مقصد سرحد پار توں کسے حملے توں لوکاں نوں بچاونا دسیا گیا۔ اجیہی صورتحال وچ سیاستداناں نوں سرکار نال تعاون کرنا چاہیدا اے۔ اوہنان نوں حالات خراب نئیں کرنے چاہیدے نیں۔
میڈیا نال گل بات کردیاں غلام نبی آزاد دا آکھنا سی، مرکزی سرکار دا دعوی اے کشمیر وچ حالات ٹھیک نیں فیر اپوزیشن جماعتاں دے لیڈراں نوں اوتھے جاون توں کیوں روکیاگیا۔ کشمیر وچ عمر عبداللہ، محبوبہ مفتی تے فاروق عبداللہ نوں کیوں گھراں وچ قید کررکھیا اے۔ مینوں اپنے گھر جاون دی اجازت کیوں نئیں دتی جاندی۔ جے حالات معمول اتے نیں فیر سانوں اوتھے کیوں نئیں جاون دتا جارہیا؟
اپوزیشن جماعتاں نے اج سرینگر تے لداخ جاون دا اعلان کیتا سی، راہول گاندھی گورنر نوں اک چٹھی راہیں ایہہ آکھِا سی کہ اوہ لوکاں نال، کشمیری گرفتار سیاستداناں تے فوج دے جواناں نال ملنا چاہندے نیں۔ اوہ سمجھ دے نیں کہ 370 ختم کرن مگروں کشمیر دے حالات ہور خراب ہوگئے نیں، سرکار ایس معاملے نوں غلط انداز نال چلارہی اے۔
جنتا دل دے رہنما شرد یادو آکھیا کہ اسیں بھارت دے شہری آں، جیویں کشمیر دے لوک نیں، اسیں حالات وگاڑن نئیں سگوں اوتھے جاکے موقعے اتے ویکھنا چاہندے آں کہ لوکاں نال کیہ بیت رہی اے۔ افسوس سرکار نے سانوں ایس حق توں محروم رکھیا۔
سرینگر ٹرن توں پہلاں غلام نبی آزاد آکھیا سی کہ اپوزیشن رہنما، کشمیر قنون توڑن نئیں جارہے،کیوں جے اسیں ذمہ دار سیاسی جماعتاں نال تعلق رکھ دے آں۔ غلام نبی آزاد نوں پہلاں وی دو واری ایئر پورٹ توں واپس دلی گھل دتا جاندا رہیا اے۔

اپنی رائے دا اظہار کرو