وزیر اعظم دے مشیر خزانہ ڈاکٹر عبدالحفیظ شیخ دا آکھنا اے کہ عالمی مالیاتی ادارے ( آئی ایم ایف) نال معاہدے نوں اخیرلی شکل دیون تیک ایس دی شرطاں سامنے نئیں لیاسکدے۔
اسلام آباد وچ وفاقی وزیراں تے مشیراں نال پریس کانفرنس کردیاں ڈاکٹر عبدالحفیظ شیخ آکھیا سرکار نے چنگے معاشی فیصلے کرکے ملک دے گردشی قرضیاںوچ مہینے دی 12 ارب روپے تیک کمی کیتی اے۔اوہناں دا آکھنا سی آوندے کجھ مہینے وچ معیشت دی بھلائی لئی مزید اچھے فیصلے کیتے جاون گے تے آوندے 6 توں 12 مہینیاں وچ حالات ہور بہتر ہوجاون گے۔
ڈاکٹر عبدالحفیظ شیخ آکھیا ہوندی سرکار توں پہلاں گردشی قرضیاں وچ مہینے وار 36 ارب روپےدا وادھا ہورہیا سی۔ لیکن وزیر اعظم عمران خان دی پالیسیاں کارن اینہاں وچ 12 ارب روپے دا گھاٹا لیاندا گیااے۔مشیر نے کیہا اسیں چاہندے آں جیہڑے لوک ٹیکس دیندے نیں،اوہناں اتے وادھو بوجھ نہ پایاجاوے،تے جیہڑے ٹیکس نئیں بھردے یا آمدن دے حساب نال گھٹ دیندے نیں۔ اوہناں اتے وادھو بوجھ پایا جاوے، ایس نوں پوراکرلن لئی سرکار نواں ڈیٹا حاصل کیتااے۔
360
