381

سابق صدر آصف زرداری گرفتار،پیپلزپارٹی تحریک چلائے گی

اسلام آباد(سجن رپورٹ) پیپلز پارٹی دے چیئرمین آصف زرداری نوں نیب نے اسلام آباد وچ اوہناں دے گھر تو ں گرفتار کر لیا اے۔ ایس توں پہلاں آصف علی زرداری تے اوہناں دی بھین فریال تالپور دی عبوری ضمانت وچ توسیع دی درخاست مسترد ہو گئی سی۔ عدالت نے فیصلہ محفوظ کر لیا سی۔ آصف زرداری تے فریال تالپور فیصلے دے اعلان توں پہلاں گھر چلے گئے سن۔
نیب دی ٹیم فیصلے دے اعلان توں بعد آصف زرداری دی گرفتآری لئی اوہناں دے گھر گئی۔ جتھے اوہناں آصف علی زرداری نے گھروں نکل کے آپ گرفتاری دے دتی۔

نیب نے سابق صدر دی گرفتاری لئی 2 ٹیماں بنائیاں سن جنہاں وچوں اک زرداری ہاؤس جدکے دوجی پارلیمنٹ ہاؤس اپڑگئی، سابق صدر پہلاں پارلیمنٹ ہاوس توں گرفتاری دیون دا فیصلہ کیتا سی، مڑ ایس نوں بدل دتا۔

زرداری ہاؤس وچ نیب ٹیم دے 6 ممبر داخل ہوئے جنہاں سابق صدر نوں حراست وچ لے لیا، اوتھوں نیب آفس لے گئے جتھے اوہناں دا اک تن ممبری ڈاکٹراں دی ٹیم طبی معائنہ کیتا۔ جیہدے وچ سابق صدر نوں پوری طرح صحت مند دسیا۔ اج اوہناں نوں اج اوہناں نوں احتساب عدالت وچ پیش کرکے جسمانی ریمانڈ لین دی بینتی کیتی جاوے گی۔
پیپلزپارٹی نے ملک بھروچ لوکاں نال رابطے تے احتجاج کرن دا اعلان کردتا۔ چیئرمین بلاول بھٹو پہلاں میڈیا نال گل بات کیتی اوس توں مگروں پارٹی دی سنٹرل ایگزیکٹو کمیٹی دے اجلاس وچ فیصلہ کیتا پئی پارلیمنٹ اندر تے باہر رجھواں احتجاج کیتا جاوے گا۔

اپنی رائے دا اظہار کرو