سرکار دی ایمنسٹی سکیم تحت اک لاکھ 37 ہزار بندیاں ٹیکس دیون لئی اپنا اندراج کرایا جوکسی وی ایمنسٹی سکیم توں فیدہ لین والیاں دی ہن تائیں وڈی گنتی اے،
ایہہ گل مشیر خزانہ حفیظ شیخ ،وصولیاں دے وزیرمملکت حماد اظہر تے ایف بی آر دے سربراہ شبر زیدی نال پریس کانفرنس کردیاں دسی اوہناں آکھیا سکیم تحت لوکاں نے ستر ارب روپے ٹیکس جمع کرایا ایس دے نال 3 ہزارارب روپے دے اثاثے ظاہر کیتے، سرکارچالو مالی ورھے دوران 5500 ارب روپے دی وصولیاں دا ہدف پورا ایف بی آروچ اصلاحات لیائے گی۔
مشیر خزانہ حفیظ شیخ آکھیا عالمی مالیاتی فنڈ نے چھ ارب ڈالر قرض نال ملک وچ پائیدار معاشی ترقی ہووے گی۔ آئی ایم ایف ولوں توسیعی فنڈ دی منظوری نال دنیا نوں پاکستان بارے چنگا سنیہا گیا اے۔دوجے عالمی مالیاتی اداریاں دی ہلہ شیری وی ملے گی۔ تے اوہ وی پاکستان نوں فنڈ دیون گے۔ اوہناں دسیا ک ایشیائی ترقیاتی فنڈ تن ارب چالیس کروڑڈالر دا اضافی فنڈ فراہم کرے گا تے دو ارب دس کروڑ ڈالر دی رقم ایس ورھے جاری کیتی جاوے گی۔ اوہناں دسیا کہ سماجی تحفظ دے پروگراماں لئی فنڈز 100ارب روپے توں ودھا کے 191 ارب روپے کردتے گئے نیں ۔
387
