ٹوٹے

لکھاری
ثنا اللہ گوندل
اللہ میاں نال وی چالاکیاں
پنڈ اک مکان لئی آیا ہویا واں۔ پھوڑھی تے بیٹھیاں اک واہک نے گل سنائی۔ آکھن لگا بئی اک تھانیدار جیہڑا اوس دا سجن سی اوہدے کول تن لکھ روپئے لے کے آیا تے کہن لگا بئی اوس دی اماں حج تے جا رہئی اے تے جس کمائی نال اوہ حج تے جا رہئی اے اوہ تھانے دی حرام دی کمائی اے۔ آکھ دے نیں بئی حرام دی کمائی نال حج نہیں ہوندا۔ ایس لئی ایہہ تن لکھ روپئے جیہڑے حرام دی کمائی دے نیں توں رکھ لے تے مینوں اپنی حلال دی کمائی دے تن لکھ روپئے دے دے۔ ایس طرحاں میری اماں دا حج حلال ہو جاوے گا۔ ایہہ رب نوں وی دا لاون دی کوشش اے۔
جے جی سکو تے
بلاول بھٹو نے قومی اسمبلی وچ تقریر کر دیاں آکھیا بئی چنے وزیر اعظماں تے احسان اللہ احسان، راؤ انوار تے ابی نندن کیتے سلوک وچکار فرق جان کے تے سمجھ کے جیو( جے ایس نوں جینا آکھ دے نیں تے)
چاچا بخشا
زنانیاں دے مارچ تے چاچی نال منہ ماری کرن مگروں چاچا بخشا جدوں بوہے دے باہر ٹاہلی ہیٹھ ڈٹھی منجی تے آ بیٹھا تے اک جوان چاچے نوں آن سلام کیتا تے حال چال پچھیا۔ چاچا پوند ای آکھ دا اے، برا حال اے جواناں۔ برائی بندے نوں اینا ذلیل نہیں کر دی جنا ایویں چنگا بنن دی کوڑ کوشش کر دی اے۔
فیس بک تے میاں محمد بخش
لگدا اے فیس بک نے ان فرینڈ کرن دا خیال وی میاں محمد بخش کولوں لیا اے۔
میاں محمد بخش فرما گئے نیں
توں بیلی تے سب جگ بیلی، ان بیلی وی بیلی
سجناں بعد محمد بخشا، سنجی پئی حویلی