721

مودی، ٹرمپ تے پوٹن دی دنیا وچ پاکستان کیہ کرے؟

لکھاری ،وجاہت مسعود
بھارت وچ لوک سبھا دے الیکشن وچ ہندو قوم پرست جماعت بھارتیہ جنتا پارٹی نے 303 سیٹاں جت لیئاں۔ بھارتی دستور مطابق اپوزیشن دا درجہ پاون لئی 55 سیٹاں دی لوڑ ہوندی اے۔ 52 سیٹاں جتن والی کانگریس سرکاری طور اتے اپوزیشن دا درجہ وی نئیں حاصل کرسکی۔ خاص ہندو کپڑیاں وچ، متھے اتے تلک سجائے، کنول دی مذہبی علامت اتے ووٹ دی مہر لاون والے بھارتی خوش نیں۔ راہول گاندھی نے انتخابی نتیجے تسلیم کر لے نیں۔ ساڈے وزیر اعظم نے نرینندر مودی نوں مبارک باد دا پیغام وی گھل دتا اے۔ سانوں سے شبہے وچ ماڑا ہوون دی لوڑ نئیں، بھارتی مردے بھارت وچ ای دبے جاون گے۔ سچی گل ایہہ وے پئی اسیں بھارت دے سیاسی منظر تے سماجی ڈھانچے توں اکھ اوہلی نئیں رکھ سکدے۔ بھارت ساڈا چڑھدے دا گوانڈھی اے۔ ہمسائے بدلے نئیں جاسکدے۔ دوجا ایہہ کہ پاکستان تے بھارت نے برطانوی ہندوستان دی کوکھ توں جنم لیتا سی۔ ہندوستان دی ونڈ نے دوہاں ملکاں دی بنیاد رکھی۔ قائد اعظم نے دوہاں وچ امریکا تے کینیڈا ورگے تعلقات دا خواب ویکھا سی، لیکن آزادی دی ست دہائیاں وچ اسیں اک دوجے دے ہتھی تے گلے پیندے رہے آں۔ پاکستان 97 فیصد مسلم اکثریت دے باوجود ریاست تے مذہب وچ تعلق دا سوال حل نئیں کر سکیا۔ اودھر معیشت دی تیز رفتار ترقی باوجود بھارتی سیاست اتے اکثریتی فرقے دی چھاپ گہری ہو رہی اے۔ 23 مئی دی شام بھارت دی سڑکاں اتے ڈھول وجاندے بی جے پی دے کامیاں نوں ویکھ کے ایہوں خیال آندا رہیا پئی بھارت وچ بیس کروڑ مسلمان آباد نیں۔ کوئی بھارتی مسلمان بی جے پی دے فتح دے جشن وچ کیویں شریک ہووے گا؟ کیہ ہندوتوا دے نعریاں نوں سن دے ہوئے لکھنؤ دے کسے مسلمان اتے اوہو بے بسی آئے گی جیہڑی پاکستان دی قومی اسمبلی دے اوس ہندو رکن نے محسوس کیتی ہووے گی جس نوں لنگھے مہینے نکی عمر وچ ویاہ بارے قنون بناون دی تجویز دیون والے نوں داڑھی والے وزیر نے غیر مسلم ہون دا طعنہ دتا سی۔ بھارت دے چناؤ جمہوریت دے نام اتے جمہوری اصولاں دی نفی دا پیغام لائے نیں۔ٹھہرنا، میں اپنے دل دے داغ دی خبر لے آواں۔

پاکستان وچ پہلے عام انتخابات آزادی دے 23 ورھیاں مگروں دسمبر 1970ءوچ ہووے سن۔ تاثر ایہواے کہ 1970 دے الیکشن شفاف سن۔ حقیقت ایہہ وے کہ شفاف الیکشن اوہ ہٹک لایادرخت اے جیہدا میوہ چکھن دی سانوں کدے اجازت وی نئیں ملی۔ مارچ 1969 وچ یحیی خان نےعملی طور اتےایوب خان توں اقتدار کھولتا،کسے وی غیرجمہوری حکمران وانگ ایسے مڈھلےمقصد یعنی اپنے اقتدار نوں لماکرنا۔ 1970دے الیکشن دا نتیجہ نہ منن پاروں پاکستان دو ٹوٹے ہوگیا۔ یحییٰ خان اپنی صدارت دی ضمانت منگدا سی۔ اکثریتی جماعت نے ایہہ منگ وی نئیں تسلیم کیتی۔ جنرل نے بندوق دی نالی راہیں اپنا رستہ کڈن دا فیصلہ کیتا۔ پاکستان ووٹ دی پرچی نال نئیں، بندوق دی نالی نال دو ٹوٹے ہویا۔ ایہہ گل اوس کہانی وچ چلی گئی جیہدا خاکہ جنرل شیر علی خان پٹودی تیار کتیاسی۔ رامپور دے شیر علی خان ڈاھڈے مذہبی خیال رکھدے سن تے خالی ہتھ لوکاں اتے ہتھیاربند فوج دے قبضے دا نظریہ رکھدے سن۔ اوہناں نے لیاقت علی دی وزارت عظمیٰ دوران ای جنرل فرینک میسروی دے حکم اتے لیفٹنینٹ کرنل (اوس ویلے)یحییٰ خان دی مدد نال اک رپورٹ تیارکیتی سی۔ جدے وچ پاکستانی فوج نوں سرحداں دے نال نظریاتی تشخص دامحافظ وی آکھیا گیا۔ 20 ورھیاں مگروں یحییٰ خان حکمران بنیا تاں شیر علی پٹودی دی سوچ توں چنگی طراں واقف سی۔اوس ملائیشیا دی سفارتکاری توں واپس بلا کے اطلاعات دی وزارت دے دتی۔ تاں جے آندے الیکشن وچ پاکستان دی نظریاتی انجنیئرنگ کیتی جاوے۔ شیر علی پٹودی نے تن مونہہ والا خاکہ بنایا۔ میجر جنرل غلام عمر دی اگوائی ہیٹھ نیشنل سیکورٹی کونسل بنائی جیہدا کم مذہبی جماعتاں دی ہرطریقے نال مدد کرنا سی۔ جنرل غلام عمر اسد عمردےوالد سن تے اوہناں نے بھٹو سرکار دوران ایس رقم توں بچے ست لکھ روپے سرکار نوں واپس کیتے سن،جیہڑے 70 دے الیکشن وچ سجے دھر دیاں جماعتاں نوں ونڈدتے گئے سن۔
دوجے پاسے آغا محمد علی تے این اے رضوی دی قیادت وچ خفیہ ادارے عوامی حمایت والی جماعتاں خلاف میدان وچ آگئے۔ تیجے پاسے شیر علی پٹودی دی اپنی وزارت اطلاعات سی، جنہیں پاکستان دے لوکاں وچ اک لکیر کھچ دتی۔اک گروہ اسلام پسند کہلایا تے دوجے نوں سیکولر سرخے آکھ دتا گیا۔ پاکستان قومی اتحاد، ضیا آمریت تے آئی جے آئی توں ہوندی ہوئی ایہہ لکیر اج تائیں موجود اے۔ فرق صرف ایہہ وے پئی کہ ہن ناپسندیدہ گروہاں نوں لبرل غدار آکھیا جاندا اے۔
ایہہ سبھ پچھوکڑ دسن دی لوڑ ایس لئی پئی اے کہ بھارت وچ بی جے پی دی کامیابی اتے پاکستان وچ کجھ حلقے بوہوں خوش ہورہے نیں ۔ اوہناں نوں گمان اے کہ بھارتی سیکولر سیاست دی ناکامی توں اوہناں دی نظریاتی ہوند سچی ثابت ہوئی۔
درس خودی دینے والوں کو بھول گئی اقبال کی یاد۔
کشمیر دےمسلماناں لئی دفتر کالاکرن والیاں نوں خیال نئیں آرہیا پئی بھارت وچ زعفرانی سیاست دی جت توں بھارتی مسلماناں دی دستار کھل کے گلے وچ آپئی اے۔ جموں کشمیر وچ بھارتی فوج ست لکھ اے مگر بھارت دے مسلماناں اتے 90 کروڑ ہندو آبادی دا قبضہ اے۔ پاکستان وچ جمہوریت مخالف سوچ بھارت دی جمہوری رواداری دی شکست توں طاقت لینا چاہندی اے۔ مڈھلہ مسئلہ ایہہ وے کہ انسانیت دامقصد، مساوات، برداشت تے معاشی ترقی اے یاں انساناں وچ مذہب، ذات پات تے اکثریتی شناخت دے بل اتے کندھاں چکنا اے؟ جمہوریت دا بنیادی اصول ووٹاں دی گنتی نئیں، سگوں فیصلے کرنا تے اختیار وچ سارے شہریاں دی شرکت اے۔ راشٹریہ سیوک سنگھ ذات پات نوں من دی اے۔ ہندو مت نوں دوجیاں دے عقیدے توں ودھ تے اچا جاندی اے، اوہ زور زبردستی نال معاملے طے کرن وچ یقین رکھدی اے ۔ نریندر مودی معیشت وچ چنگی کارگزاری نئیں وکھاپائے۔ بے روز گاری، صنعتی پیداوار، زرعی آمدن دے اشاریے خراب ہوئے نیں لیکن بھارت 56 انچ دی چھاتی دے نشے وچ اے۔
اسیں اکیویں صدی وچ اک اجیہی دنیا ویکھ رہیا اے جتھے امریکا وچ ڈونلڈ ٹرمپ، بھارت وچ نریندرمودی، روس وچ ولادیمیر پوٹن تے ترکی وچ طیب اردوان برسراقتدار نیں۔ ہن پاکستان لئی کیہ رستہ بچیا اے۔؟ ساڈے کول انسانیت داسانجھا ورثہ یعنی جمہوریت دی آس موجود اے۔ کیہ اسیں پاکستان وچ جمہوری مساوات، مذہبی رواداری دے اصولاں اتے چلدیاں پیداواری معیشت دا نمونہ بناسکدے آں،جس نوں دنیا وچ ایس طراں مثال بناکے پیش کیتا جاسکدا اے جیویں کجھ چرپہلاں نیوزی لینڈ دی وزیراعظم جیسنڈاآرڈن دا نام پاکستان وچ گونج رہیا سی۔

اپنی رائے دا اظہار کرو

مودی، ٹرمپ تے پوٹن دی دنیا وچ پاکستان کیہ کرے؟” ایک تبصرہ

  1. trump,modi te erdogan treh votaran de chuny banday ne asi pakistan wich hali vi taliban te dojay intiha pasanda de dhar ich haen asi unhan trehan wegay eei haen

تبصرے بند ہیں