430

صدر ٹرمپ چینی درآمدی شَیواں تے ڈیوٹی ہور ودھا دِتی

لہور (سجن رپورٹ) امریکی صدر ڈونلڈ ٹرمپ نے چین توں درآمد کِیتیاں جان آلیاں 5700 شیواں تے ڈیوٹی 10 فیصد توں وَدھا کے 25 فیصد کر دِتی اے، امپورٹ ڈیوٹی چ ایہہ وَادھا دو سو ارب ڈالر بندا اے۔ کہیا جا رہیا اے کہ صدر ٹرمپ چین نوں دِتیاں تجارتی رعایتاں ختم کرن دی وی تیاری کر رہے نیں۔ ایس صورتحال نال عالمی معیشت نوں وَڈے جھٹکے تے فنانشل مارکیٹ وچ بھونچال دا ڈر اے۔
چینی شیواں تے ٹیکس ودھاون دے امریکی اعلان بعد چینی حکومت ولوں جاری بیان وچ کہیا گیا اے کہ چین نوں جوابی کارروائی کرن تے مجبور کیتا جا رہیا اے۔ منگل نوں صدر زی دے اُچیچے نمائندے تے امریکی نمائندیاں دی تجارتی مسئلیاں اتے گل بات وچ معاملہ کُجھ چوکھا آگے نہیں وَدھ سکیا تے اَج واشنگٹن وچ گل بات فیر شروع ہونا سی۔
بلومبرگ نے اپنی اِک رپورٹ وچ دسیا کہ ایس صورتحال دا ایشیائی سٹاک مارکیٹاں تے اثر پین دا نتیجہ چوکھی ٹریڈنگ دی شکل وچ نکلیا۔ چین وچ شئیرز دیاں قیمتاں تیزی نال ڈِگ پئیاں تے بینکاں دے فنڈز نوں سٹاک لوکل مارکیٹ وچ آنا پیا۔ دوجے پاسے لندن وچ ایس اینڈ پی فیوچرز دے سَودیاں وچ مَندی آ گئی۔
امریکہ اہلکاراں مطابق ٹیرف وچ وادھے دا اطلاق اوہناں شیواں تے وی ہووے گا جیہڑیاں ایس ویلے چین دیاں بندرگاہواں توں امریکہ وَل ٹور دتیاں گئیاں نیں۔
امریکہ چین تجارتی مذاکرات وچ ایہہ نویں مایوس کُن صورتحال پچھلے ہفتے اودوں سامنے آئی جدوں مذاکرات شروع ہوون توں پہلاں صدر ٹرمپ نے اعلان کیتا کہ اوہ چین توں امپورٹ کیتیاں جان آلیاں شیواں تے 25 فیصد ٹیرف لاون دا منصوبہ اَگے ودھاون گے۔ اوہناں دسیا کہ اوہ 325 ارب ڈالر مالیت دی دوجیاں چینی درآمدات اُتے وی ڈیوٹیاں لاون گے۔
موڈیز دے تجزیہ کاراں دا کہنا اے پئی ایہناں فیصلیاں تے عمل ہوون وچ اَجے کئی ہفتے لگن گے پر ایہدا چین، امریکہ تے عالمی معیشت تے مارکیٹ اُتے گوڑھا اثر پئے گا۔ موڈیز دے نے اپنے تجزیہ وچ کہیا اے کہ امریکہ چین تجارتی جھیڑا آخری درجہ تائیں وَدھن نال امریکہ وچ 2020ء دے اخیر تک کاروباری مَندا ہو سکدا اے۔ بلومبرگ دے سیانیاں دا خیال اے کہ ایس صورتحال نال چینی معیشت دی ترقی دی رفتار گھٹے گی تے آئی ایم ایف دے تجزیہ کاراں دا خیال اے کہ امریکہ دی معاشی ترقی وی گھٹے گی۔

اپنی رائے دا اظہار کرو