لکھاری زاھد اقبال بٹ
احساس پھلاں آوندا اے فیر خیال آوندا اے اس توں مگروں عمل دے واری آوندی اے پر ساڈی پنجاب پلس دنیا دی نرالی تے لاڈلی پلس ایے جو سب توں پھلاں انھے واہ عمل کردی اے فیر خیال دے ڈھائے چڑھدی اے تے اخیر وچ احساس دی بانسری بلھا راھیں راگ الاپنا شروع کر دیندی اے ۔ ایہ احساس بے فیدا ھوندا اے کیونجے جو کجھ ھو چکیا ھوندا اے اوس نوں مٹایا نھیں جا سکدا کیونجے بھوں دیر ھو چکی ھوندی اے ۔مینوں انج لگدا اے جیویں ھزاراں ورھے پرانی ایشین مکسچر نسل حیاتیاتی جینز اں وچ گڑ بڑ کر چکی اے جیھدا اپاء مشکل نظر آرھیا اے جو چنگا سوچ ای نھیں رھی تے نا ھی چنگا کر ھی اے تے نا ھی چنگا کر سکدی اے پنجاب پلس دے کالے کرتوتاں توں سب واقف نیں ۔تھانیاں وچ پلس حتھوں ماڑیاں لوکاں دی لتر کھپی ، جھوٹ نوں سچ تے سچ نوں جھوٹ وچ بدلن دی صلاحیت ، ماڑیاں لوکاں نوں تفتیش بھانے سارے ٹبر نوں تھانے دیاں جیلاں وچ بند کرنا، پٹھیاں لمیاں پا کے چمڑے دے چھتراں نال چھترول کرنا تے حساس حصیاں اتے تشدد کرنا ، تسیں پلس گردی دیاں کھانیاں میڈیئے راھیں سندے رھندے اوہ کہ کئی بے گناھواں دا خون پلس مقابلیاں وچ کرن رواج عام اے تے انج لگدا اے جیویں پلس نوں بندے مارن دا لائیسنس حاصل اے
ساڈی پلس کول تفتیش کرن دا صدیاں پرانا جسمانی تشدد داطر یقہ ورتیا جاندا اے کہ پھڑے بندے نے جرم منیا کہ نھیں ،یاں جھوٹیاں سچیاں گواھیاں اتے زور دتا جاندا اے ۔پلس دی تھانیاں وچ ما رکٹائی توں بعد عدالتاں وچ اعترافی بیان دی کوئی حثیت نھیں ھوندی فیر پلس لوکاں اتے ٹار چر کس قنون ھیٹھ کر دھی اے ۔ بد کردار،نالائق ، ان پڑہ پنجاب پلس دے درندے انساناں دی وڈہ ٹک کرن وچ مصروف نیں ۔ پلس ھتھوں مرن والیاں دے وارث اکو ای رٹیا فقرا بولدے نظر ی آوندے نیں “سانوں انصاف چاھیدا اے ” پلس والیاں نال فوٹو سیشن تے فیر پلس دا بیان ” ھر قیمت اتے انصاف ملے گا ،ملزماں نوں پھڑ کے سزاواں دتیا جاون گیاں ، بندہ پچھے تساں پھڑے بندے دی جان کیوں لئی ،ما ر کٹ کے ماریا کیوں ..؟؟ موڈھے اتے چار چار پھل لاء کے آکڑ آکڑ ٹردیاں شرم نھیں آوندی کہ تھاڈے گھر (پنجاب ) وچ کیہ ھو رھیا اے ۔سلوٹاں دے بھکھے درندیو مرن والیاں نوں کیا تسیں واپس لیا سکدے اوہ… ؟ ایتھے تھاڈی بولتی بند ھو جاندی اے ،کیہ اجیھی موت تسیں اپنے گھر لئی چنو گے،تسیں انج آپ مر نا چاھو گے…. اسیں وعدہ کرنے آن تھاڈے ٹبر نوں انصاف دواواں گے،تسیں ساڈے اتے یقیں رکھو ،انصاف لئی عدالت دا ھر بوھا کھڑکاواں گے۔یقینن تسیں پلس ھتھوں مرنا پسند نھیں کرو گے ،تسیں صرف اپنی طاقت ماڑیاں لوکاں دی موت وچ ویکھن دے عادی ھو چکے اوہ تھانوں ماڑے لوکاں نوں مارن دا چسکا پے گیا اے ، تھاڈے نیڑے طاقت دے معنی کر ائمز نیں ، زندگی وچ سوھنے رنگ بھرنا نھیں تے نا ھی پریت دیاں possibilities کھوج کرنا اے۔سارے پلسیاں دی مینجمنٹ نوں صلاح اے کہ پلس وچ بھرتی ھوون والیاں دی چھاتی تے قد فیتے پھڑ کے میچے کرن دی تھاں پھلاں دماغ دا میچا کرن دا کم کیتا جائے کہ ایہ پلسیا شھریاں دی حفاظت کرے گا کہ شھریاں نوں تشدد دا نشانہ بنائے گا ایہ نفسیاتی مرحلا بھوں ضروری اے تے پتا چلے گا کہ اوہ پلس وچ بھرتی ایس لئی تے نھیں ھو رھیا کہ اوہ اپنے اندر دا غصا ماڑے لوکاں اتے کڈھ سکے اسلئی پلس چ بھرتی ھوون والیا دی نفسیاتی پن چھاں کرنا بھوں ضروری اے تاں جے آون والے ویلیاں وچ کجھ بھتری آسکے،
ایہ وی سچ اے تشدد دا شکار ھوون والے لوکیں موقع ملن اتے اپنی واری ضرور لیندے نیں شید پلس وی اجیھا ھی کارخانا اے جتھے لوکیں بھرتی ھو کے اپنا کتھارسس کر دے نیں تے روزانہ کسے کمزور دی کھوج وچ رھندے نیں تے پلسئے آپوں کھندے نیں کہ سا نوں ماڑے لوک لبھ وی جاندے نیں ، ساڈیاں دھیاں بھیناں اکلیاں باھر جا نھیں سکدیاں کوئی نہ کوئی بے مراد سڑک کنارے واھیاتی ضرور کرے گا تے اوھنوں کوئی وی نھیں ڈکے گا کیونجے پلس وی ایس چھیڑ چھاڑ وچ برابر دی شریک ھوندی ای پلسئےچوکاں نوں مل مار کے قمیضاں دے بٹن کھول انج کھلوتے ھوندے نیں جیویں اوہ شھر دے وڈے بدمعاش نیں ۔ اخیر وچ دو چار لائیناں لکھدا جاں ساڈے سارے سیاستدان (70) ستر سال توں سرکاری خرچیاں دی گھوڑی اتے چڑھے نیں ایھناں دیاں بدمعاشیاں تے چکر بازیاں مکن دا ناں ای نھیں لیندیاں پالیمنٹ دے اندا تے پارلیمنٹ توں باھر ، بیوروکریٹاں دیاں شاہ خرچیاں چا ء بند کرن نال ختم نھیں ھونیاں ایہ بے لگام گھوڑے کسے دے وس وچ نھیں 70 ھزار کنوینس الائونس لے کے وی چار چار گڈیاں رگڑ رھے ھوندے نیں کوئی پچھن والا نھیں سب مر کھپ گئے نیں مالی بے ضابتگیاں دی حد ھو گئی اے ۔وپار کرن والے وڈے ساھن پوری ر یاست نوں اپنی من مرضی نال گھبن کرن وچ جتے نیں ۔ جتھے سارا ھی کچراتے گند ھووے اوھدے وچوں گند ای نکلے گا سٹے وچ مفلس تے احمق روحاں دانش مندی دے قابل ھو ای نھیں سکدیاں ۔۔۔
826
