سری لنکا حملے، وَڈے وپاری دے 2 پُتر وی شامل

لہور (سجن رپورٹ) سری لنکا وچ ایسٹر دے موقعے تے حملے کرن والے 7 خود کش دہشتگرداں وچوں دو اِک وَڈے مسلمان تاجر دے پُتر سن۔ حملیاں وچ مرن والیاں دی گنتی وَدھ کے 259 ہو گئی اے۔ اِک دہشتگرد دے گھر چھاپے وچ دہشتگرد دی بیوی نے وی آپ نوں بمب نال اڑا لیا جیہدے سِٹے چ 3 پولیس آلے تے نال مرن والی عورت دے 3 بچے وی مارے گئے۔
مقامی اخباراں تے عالمی صحافتی اداریاں دیاں رپورٹاں وچ دسیا گیائے کہ حملیاں دی منصوبہ بندی تے حملے کرن دا دعوا دہشتگرد تنظیم اسلامک سٹیٹ (IS) نے کیتائے۔ ہُن تائیں دی پُن چھان توں پتہ لگیائے کہ کولمبو دے 2 ہوٹلاں چ حملہ کرن والے 2 سَکے بھرا اِک وَڈے وپاری یوسف ابراہیم دے پُتر سن اَتے اوہناں دیاں عمراں 33 تے 31 ورھے سن۔ شک ہے کہ ایہناں دوواں بھراواں دھماکہ کرن والا مواد کسے جیکٹ چ نہیں سگوں ہتھاں چ پھڑے تھیلیاں (بیگ) راہیں ہوٹلاں دے بوفے ہالاں تائیں کھڑیا۔ یوسف ابراہیم بارے دسیا جاندئے پئی او اِک سیاسی پارٹی ویشوا ویمکتی پریمنا دا رکن وی سی اَتے سری لنکا دے مسلمان وزیر تجارت رشاتھ بتھی الدین تے اپوزیشن لیڈر مہندا راجا پکسا دیاں سیاسی سرگرمیاں چ وی آوندا جاندا سی۔ پولیس یوسف ابراہیم دے تیجے پُتر کولوں وی تحقیقات کر ریی اے، واردات دا کھرا نپن لئی درجناں بندیاں توں پچھ پرتیت کیتی جا رہی اے۔