سجن خبرکاراں دی ایہہ سوچ اے پئی سرکاراں لئی معلومات دی وزارت دی کوئی لوڑ نئیں۔ ایہہ محکمہ برطانیہ دی قابض سرکار نیں مخبری لئی بنائی سی تے ایس دا وی آئی جی ہوندا سی۔ خبرکاری تے مخبری وکھری شیواں ہین خبرکاری لوکائی نوں اطلاع تے معلومات دینا اے تاں اوہ اپنی بھلائی لئی سرکاراں کولوں چنگے فیصلے کران لئی اوس نوں راضی کران جوگے ہو جاون۔ معلومات دی وزارتاں پٹھی تے کوڑھ خبر دین نال لوکائی کولوں سرکاری کامیاں نوں فیدا دیندی اے۔ ایہہ گل ہن ثابت ہوگئی پنجاب دا معلومات دا وزیر ساڈی ہندو برادری لئی نفرت دا پرچار کیتا۔ تحریک انصاف دے آگواں نیں اوس توں استعفا لے کے ایہہ ثابت کیتا پئی ساڈے دیس دے سارے مذہب احترام لائق نیں۔ ایس بارے ایہہ گل وی یاد روے کے قائد اعظم جناح نیں پاکستان بناون تے ایہہ آکھیا سی پئی ہن ونڈ توں پہلاں دی گلاں پچھے چھڈ کیوں جے ساڈی آزاد ریاست دے سارے شہری برابر نیں تے سارے مذہب ہر اک بندے دا اپنے رب نال ذاتی مسئلہ اے۔ ایہہ چنگا ہو ریہا اے پئی اسی قائد دی دسے راہ دا پالن کردے پئے آں۔
298
