686

موت دا کھیڈ…..!

طارق عزیز بٹ:

اِک خبر موجب عید دے اگلے دیہاڑ ٹرو نوں رات تائیں موٹر سیکل دے ایکسیڈنٹ کارن زخمی ہوون والے گھٹو گھٹ 200 توں وَدھ نوجوان مُنڈے تے نِکے بال پمز ہسپتال اسلام آباد دی ایمرجنسی چ لیاندے گے جنہاں وچوں چوکھے 15 توں 17 وَرھے عمراں دے سن۔ گھٹ توں گھٹ 100 مُنڈیاں دے جُثے دی اِک اَدھی ہڈی پَسلی ٹُٹی پئی سی، 20 دے نیڑے لوکاں نوں ڈاڈھی تشویش والی تے 5 نوں مردہ حالت چ ہسپتال لیاندا گیا، 2 مریضاں دے ہَتھ پیر چوکھے زخمی ہون پاروں کَٹنے پئے۔ ایہہ خالی اِک شہر دے اِک ہسپتال چ 12 گھنٹے دوران لیائے جان والے مریضاں دی گنتی اے، ایس توں اندارہ لایا جا سکدائے کہ باقی ملک دا کیہ حال ہوسی۔ اطلاع اے کہ جڑواں شہراں تے لاگے دے علاقیاں وچ اک دیہاڑ اندر موٹر سیکل حادثیاں کارن لگ بھگ درجن موتاں ہوئیاں نیں۔
میرا جی ٹی روڈ راہیں راولپنڈی لہور وچکار آنا جانا لگا رَہندائے، ایہہ پاکستان دا سبھ توں چوکھی آبادی والا علاقہ اے۔ گجرات، وزیرآںاد، گجرانوالہ تے دوجے پِنڈاں شہراں دے لوک 50، 100 کلومیٹر پینڈا موٹر سیکل اُتے کر لیندے نیں۔ ایہناں علاقیاں تے لہور وچکار موٹر سیکل تے چنگی چی رکشہ لوکل ٹرانسپورٹ لئی وَرتیا جا رہیائے۔ پَک نال آکھیا جا سکدائے کہ سیالکوٹ، فیصل آباد، جھنگ، اوکاڑہ، ساہیوال، ملتان تے دوجے وَڈے شہراں دا حال وی ایہو ہوسی۔
پاکستان دی آبادی جِنی تیزی نال وَدھ رہی اے اوہدے مقابلے چ اونی ترقی نئیں ہو رہی۔ حیاتی دا ہر کھیتر اُلٹا زوال دا شکار اے، ٹرانسپورٹ دا شعبہ وی ایہناں وچوں اِک اے۔ سفری سہولتاں نہ ہون پاروں وَڈی گنتی چ لوک موٹر سیکل دی سواری وَرتن تے مجبور نیں۔ چھوٹے شہراں تے پِنڈ تھاواں دے لوکاں جد آپنے کِسے ساک وَل دوجے پِنڈ یاں شہر جانا ہووے تے او موٹر سیکل تے سفر کر دے نیں کیوں جے ایہدے چ سوکھت دے نال نال پیسے دی بچت وی ہوندی اے۔ لوک آپنے بال بچے سَنے موٹر سیکل اُتے ای سفر تے ٹُر پیندے نیں پر اوہناں وچاریاں نوں ایہہ پتہ نئیں ہوندا کہ 2، 3 بچیاں تے گھروالی نوں نال بیٹھا کے ہائی وے اَپر موٹر سیکل چلانا کِنا خطرناک ہو سکدائے۔ اِک اندازے موجب پاکستان چ ایس ویلے ٹریفک حادثیاں چ مرن والیاں دی چوکھی گنتی موٹر سیکل سواراں دی ہوندی اے کیوں جے وڈی گڈیاں دے ڈرائیوراں دی لاپروائی تے تیز رفتاری کارن اَن گنت موٹر سیکل سوار ایہناں گڈیاں تَھلے آ کے کُچلے جاندے نیں پَر اجیہے ایکسیڈنٹ چ اِکا دُکا ہلاکت ہوون پاروں گل میڈیا چ نئیں چُکی جاندی۔ ایسے حادثیاں چ کئی ماں پیو بچیاں سَنے آپنی جان گنوا بہیندے نیں ۔ سستی سواری ہون دی وجہ نال سکول کالج جان والے چوکھے بچے وی موٹر سیکل وَرتدے ہین اوہناں وچوں وی سینکڑے نوجوان موت دے ایس کھیڈ دا شکار ہو رہے نیں۔
اَساڈے ایتھے پیدل ٹُرنے تے سیکل چلانے نوں ہتک سمجھیا جاندائے، کسے نے دس قدم وی جانا ہووے تے موٹر سیکل یاں گڈی اُتے جاسی۔ نِکے نِکے بال گلی محلے تے سڑکاں سَنے ہر تھاں موٹر سیکل نسائی پھر دے نیں تے انتہائی خطرناک کرتب کر دے نیں۔ ماپیاں دی ذمہ داری اے کہ آپنے بالاں نوں سانبھ کے رکھن، بالاں دی نِکی جئی لاپروائی اوہناں لئی ساری حیاتی دا روگ بَن جاندی اے۔ انعامی سکیماں اِچ چینی موٹر سیکل دھڑا دھڑ وَنڈے جاندے نیں، اینیاں موٹر سیکلاں شائد چین اندر وی نہ ہوون جِنیاں پاکستان ج ہین۔
سیکل سواری نوں رواج دیون لئی ایہدی ہلہ شیری کرنا چاہیدی اے کیوں جے ایہہ زیرو پالوشن نال انرجی بچاندی اے تے نالے حادثے وی گھٹ ہوندے نیں۔ سیکل سواراں لئی وکھرے ٹریک بنانے چاپیدے نیں تاں جے اوہناں دی راکھی دا سربندھ ہو سکے۔ ٹرانسپورٹ نظام دی بہتری وَل بھرواں دھیان دین دی لوڑ اے، ملک چ کُجھ وڈیاں سڑکاں تے بن گئیاں نیں پر تھلڑی پَدھر اُتے اسیں حالے تائیں کوئی چنگا ٹرانسپورٹ نظام نئیں اُسار سکے۔ پکی پیڈی ترقی لئی تگڑے نظام ہیٹھ بَھرویں منصوبہ بندی ضروری اے، پَر لگدا اے کہ اَساڈی ریاست دی ترجیحات لوکائی دی تھاں شائد کُجھ ہور نیں؟

اپنی رائے دا اظہار کرو

موت دا کھیڈ…..!” ایک تبصرہ

تبصرے بند ہیں