425

عمران دی بھٹو ورگی حرکتاں


لکھاری، منصورآفاقی

وڈےافسانہ نگار ملک مہر علی دا آکھنا سی اوس آندی سردیاں وچ رکھ جھڑدے کئی واری ویکھے ہوون گے مگر بندیاں نوں جھڑدیاں پہلی وار ویکھیا سی، سوچیا پئی درختاں دے جھڑن دا موسم ہوندا اے مگر بندیاں دا نئیں۔
سبز پتیاں دے محافظو اکھاں کھولو، نئیں تاں تہاڈ رنگ پیلا پے جاوے گا، کجھ پتہ نئیں کدوں خزاں دی رات آجاوے، میں عمران خان نوں ویکھدا آں تاں ماضی وچ کدھرے گواچ جاندا آں، اج کل اوہ وی ذوالفقار علی بھٹو ورگی حرکتاں کررہے نیں۔
ترکی دے صدر اردوان تے ملائیشیا دے وزیراعظم مہاتیر محمد نال مل کے اسلامی بلاک بناونا چاہندے نیں، ایس ویلے اقتدار ای نئیں زندگی وی خطرے وچ اے۔ آخر اوہ کیہڑی محبت اے کہ اسفند یار ولی کہہ رہے نیں، مولانا نوں گرفتار کرلیا تاں میں احتجاج دی قیادت کراں گا، دنیا جان دی اے کہ دوہاں دے نظریاں وچ لہندے چڑھدے دا فرق اے۔ دوہاں دیاں جماعتاں اک دوجے دی ویری رہیاں نیں۔
عمران خان دی ٹیڈھی اداواں اپنی تھاں تے مگر ضروری نئیں کہ تریخ آپ نوں دہرائے۔ جدوں بھٹو نے امریکا نوں للکاریا سی، اسلامی سربراہ کانفرنس کرائی سی، عرباں نوں آکھیا سی کہ اوہ تیل نوں ہتھیار دے طور اتے ورتن ۔اوہناں پاکستان نوں ایٹمی طاقت بناون دی مڈھ رکھی سی۔ تے امریکی وزیر خارجہ کسنجر آکھیا سی ، اسیں تینوں عبرت دا نشان بنادیواں گے، اوہ ہس پیا تے اپنی کرسی دے پکے ہوون دا بھٹو نوں یقین سی، فیر بھٹو خلاف اپوزیشن کٹھی ہوئی 9 ستارے چمکن لگے۔
پہلا ستارہ مولانا فضل الرحمٰن دا والد مفتی محمود سی، اوس نے پاکستان وچ نعرہ لایا ’ ایہہ الیکشن نئیں سلیکشن اے۔ دوجا اسفند یارولی خان دے والد تے باچا خان دا بیٹا عبدالولی خان سی، تیجا ایئر مارشل اصغر خان ، چوتھا شاہ احمد نورانی، پنجواں پروفیسر غفور احمد سی۔ اپوزیشن تے جنرل ضیاالحق مل کے بھٹو نوں عبرت دا نمونہ بنادتا۔ اُوس دا قتل پاکستان دے عدالتی نظام اتے وی اک بدنما داغ وانگ چمک رہیا اے، ہاں ایہہ ضرور اے بھٹو دی ٹیڈھی اداواں وی گھٹ نئیں سن۔
پیپلز پارٹی تے نون لیگ دی لیڈر شپ وی ایس کھیڈ وچ شریک اے، مگر اوہ بوہت محتاط نیں، کسے کچی زمین اتے پیر رکھن نوں تیار نئیں، ایہہ دوہاں جماعتاں ایس ویلے مجبور نیں کہ صرف کسے اکھ دا اشارہ ویکھن ۔ اوہ کھلی اکھاں نال وی کہہ رہے نیں کہ جے اشارہ لال ہویا تاں گڈی رک جاوے گی۔
انصارالاسلام دے اقتدار دی نویں تحریک شروع ہوون توں پہلاں ای ناکام ہوجاوے گی، انگریزاں نوں چھڈ کے پنجاب وچ سکھاں نال لڑائی ، ریشمی رومال تحریک، تے تحریک طالبان پاکستان مگروں تنظیم انصارالاسلام دی جنگی مشقاں نال اقتدار حاصل کرن لئی ہتھیاراں دی نمائش نے بے یقینی پیدا کردتی اے۔ خیال اے پئی ایس بے یقینی وچ عمران خان دا اپنا ہتھ وی اے، تے آل دوال بیٹھے ہوئے لوکاں دا وی۔
عمران خان دی دو بنیادی غلطیاں نیں پہلی ایہہ کہ اردگرد اوہو ٹیم جمع کیتی جو پچھلی حکومتاں وچ وی شریک سی، اوہ کسے اہل ہوندی تاں پہلے ناکام کیوں ہوندے۔
دوجی وڈی غلطی ایہہ کہ آپ تے عمران خان وزیراعظم بن گئے مگر پارٹی نوں اقتدار وچ شریک نئیں کیتا۔ بھٹو صرف ایس لئی اینہے چکر تیک لوکاں دے دلاں وچ زندہ رہیا کہ اوس ورکراں نوں اپنے اقتدار وچ شریک کیتا سی۔
ایتھے حالات ایہہ نیں کہ وزیر اپنے ورکراں لئی کسے افسر نوں فون وی نئیں کرسکدے، حالے تائیں پیپلزپارٹی ، نون لیگ، جمعیت علمائے اسلام، اے این پی، ایم کیو ایم دے بندے سیٹاں اتے بیٹھے نیں۔
انج لگدا اے عمران خان وزیراعظم بن کے مجبور بن گئے، اوہناں نوں غور کرنا چاہیدا اے کہ اوہناں دی اکھاں تے کن کون بنیا اے۔ ایہہ اوہ لوک نیں جیہڑے پہلی سرکارں دی اکھاں تے کن سن۔ اوہ ہن کیہ کہہ رہے نیں۔
قاسم خان سوری، اسد عمر، سیف اللہ نیازی تے گل حمید نیازی کیہ کہہ رہے نیں۔ سبطین خان تے علیم خان نے تن چار مہینے جیل کیوں کٹی اے ؟ پی ٹی آئی دے ورکراں نال مسلسل کیہ سلوک ہورہیا اے۔ کیہ پارٹی اقتدار وچ شامل اے یاں صرف عمران خان وزیر اعظم نیں۔

شکریہ،،روزانہ جنگ

اپنی رائے دا اظہار کرو