150

انھے ، ڈورے طبیب ….. زاھد اقبال بٹ

لکھاری زاھد اقبال بٹ
جیون وچ دماغ نال چھیڑ چھاڑ کوئی کھیڈ تماشا نھیں ۔ جتھے اک جنس دی آزادی اوتھے دوجی.. جنس دی بربادی ۔ جتھے حسن دی خرابی اوتھے حیا دی منادی ، جتھے دھکے شاھی نال تلنگے لچ لفنگے شوخے دل گیر کیتے ، اوتھے ادبی سیاسی سوجھوان چھترول نال اخیر کیتے ۔
دماغ وچ کرودہ تے انسانیت نال وتکرے دی ایہ خونی کھچڑی نھیں پک سکدی ۔ دماغ ڈنگ ٹپائو کھڈونا نھیں نہ ھی ایہ فلٹریشن پلانٹ اے تے نہ ھی کباڑیاں اگے لگے سکریپ دھندے دی کانٹ چھانٹ اے۔ دماغ من مرضی دے وچاراں دی بندر بانٹ نھیں، ایہ تاں جگت پریتم لاٹ اے ۔ دماغ وچ لوکائی دی تقسیم تے نفرت دا لاوہ پکا کے دماغ مٹھاس دی تھاں کوڑہ کرودۃ ھی کڈہ دا اے ، دماغ مٹھرے بولاں دی اگیائی کریندا اے ایھدا کم ھی مٹھاس تے خوشبوئی کھلارنا ھے اس نرول سرکٹ نوں واحیات سازشاں سکھاون دی تھاں وگدے پانی وانگوں اپنے رستے بناون دی کھیڈ کرن دیو ، نفس نفسی ، توھم پرستی ، خودپرستی ، انا پرستی دی سرپرستی زورآورا تیرے کس کم ۔ تیریاں مکاریاں ، چکر بازیاں ، واری اتے واریاں ، ہر ویلے ،سچ جھوٹ دیاں قلا بازیاں مارن نال سارے سماجی بنتر دے وجود دی تباھی بربادی اے ۔
ساری حیاتی سارے وسنیکاں نال بےایمانی کرن والے ہمیشا کوڑے کھوہ ھی رھندے نیں جوکوڑہ کرودہ بیج دے نیں اچانک کیویں مٹھڑے ھو سکدے نیں اتوں لوکاں نوں سبق رٹاندے رھندے نیں پئی ساڈی چال نوں چال نہ سمجھیا جے اساں حقیقت آں کن کھول کے سن لوو سانوں کدی خواب نہ سمجھیا جے ۔
زورآوراں دیاں ایھ تڑھیاں ھن ایس ویلے دیاں کڑیاں نیں ۔۔۔۔۔ مترا ۔۔۔ انھیری چلیا ایہ کوٹ نھیں لتھنے ،پلے بدھے انھے ڈورے طبیب مگروں نھیں لھنے ؛ساڈیاں کنڈھاں اتے ایھ لدے پاڈے اخروٹ ساڈیاں نسلاں سھنے ؛ جسے ( جسم )چمڑیاں جوکاں ساڈے بن گئے گھنے (زیورات)، ایہ سیاہ کالےھیرے موتی موت تائیں مگروں نھیں لھنے ۔۔۔۔ مترا ۔۔۔۔ جد زورآوراں تند فقیری ، گنجھلاں ماری بنا دتی، قول قراردے پینڈیاں وچ جوعارف راہ سی چھپی ، زورآوراں چوری چھپے راہ مسافت ریاضت منٹاں وچ سوکن بنا دتی ۔ ۔۔۔۔۔۔ مترا۔۔۔۔۔۔۔ ڈھول دی تھاپ اتے اجے وی ایہ خونی رقص جاری اے ، اس خون خرابے دی کھیڈ وچ اساں ھنر کیہ سکھنا سی ، بھلا ھووے زورآوراں دا ، نسلاں نوں کورٹ کچہری سکھا دتی ……

اپنی رائے دا اظہار کرو