291

ورلڈ کپ، پوائنٹس ٹیبل اُتے بارش دا پہلا نمبر

نوٹنگھم (سجن رپورٹ) انگلینڈ دے شہر نوٹنگھم وچ آئی سی سی ورلڈ کپ دا اِک ہور میچ بارش کارن نہ ہو سکیا. بھارت تے نیوزی لینڈ وچکار مِتھیا میچ منسوخ ہون پاروں میچ دے دو پوائنٹ دوواں ٹیماں وچ وَنڈ دِتے گئے. پوائنٹ ٹیبل تے نیوزی لینڈ ہُن تائیں 4 میچ کھیڈ کے 7 پوائنٹس نال پہلے جد کہ آسٹریلیا 4 میچ کھیڈ کے 6 پوائنٹس نال دوجے نمبر اُتے ہے۔ انڈیا 3 میچ کھیڈ کے 5 پوانٹس نال تیجے، انگلینڈ 3 میچ کھیڈ کے 4 پوائنٹس نال چوتھے نمبر تے آ گیا اے. سری لنکا جیہدے 2 میچ بارش کارن منسوخ ہوئے، 4 میچ کھیڈ کے 4 پوانٹس نال پنجویں تے ویسٹ انڈیز 3 میچ کھیڈ کے 3 پوائنٹس نال چھیویں نمبر تے کھلوتے نیں. بنگلہ دیش تے پاکستان نے چار چار میچ کھیڈ کے اِک اِک میچ جتیا، اِک اِک میچ مینہ کارن منسوخ ہوئیا تے دوواں ترئے ترئے پوائنٹ کَھٹے پر بنگلہ دیش چنگے رن ریٹ کارن 7ویں تے پاکستان 8ویں نمبر اّتے وے.

مینہ مِتھے ویلے تائیں نہ رُکے تے میچ منسوخ کر کے میچ دے دو پوائنٹ کھیڈن والیاں دوواں ٹیماں وچ اِک اِک وَنڈن دے قنون نے ایس ورلڈ کپ نوں آرگنائزراں دے اندازے توں ودھ نقصان پہنچایا اے تے کرکٹ دے تماشائی ایس قنون اُتے کڑی تنقید کر رہے نیں. انگلینڈ وچ بارشاں دا موسم اے تے میچاں دوران بارش ہوون دا خطرہ رہندا اے. مینہ نے سبھ توں چوکھا نقصان سری لنکا دی ٹیم نوں پہنچایا جیہدے 2 میچ منسوخ ہوئے تے اوہنوں صرف دو پوائنٹ لَبھے. اک کرکٹ فین نے مینہ دے ورلڈ کپ اُتے خوفناک اثر بارے طنز کرن لئی کھیڈن والیاں 10اں ٹیماں دی پوزیش دے چارٹ وچ مینہ نوں وی شامل کر دِتا تے 4 میچ منسوخ ہوون دے 8 پوائنٹ دے کے بارش نوں پوائنٹس ٹیبل تے ساریاں ٹیماں توں اُتے پہلی پوزیشن دے دتی. اِک بھارتی فین نے کیہا کہ بارش تے ورلڈ کپ دی گیارھویں ٹیم بن گئی اے. چار میچ بارش نے روڑھ دِتے نیں، جے کر آئی سی سی ہُن وی نہ جاگی تے پورا ورلڈ کپ ہی بارش وچ ڈُب سکدا اے. کُجھ کرکٹ ناقداں دا کہنا اے کہ کسے ٹیم دا اک میچ وی منسوخ ہوون دا اوہنوں ناقابل چوکھا نقصان ہو سکدا اے تے جے کسے ٹیم دے چوکھے میچ بارش پاروں منسوخ ہو جاون تے اوہنوں آپنا کھیڈ وکھاون دا موقع ای نہیں ملے گا. کجھ ناقداں دا خیال اے کہ آئی سی سی نوں میچ بارش کارن نہ ہوون دی صورت وچ کسیے ہور دن میچ کران بارے سوچنا چاہیدا سی. اِنج ہوندا تے تماشائی وی خوش رہندے تے سپانسراں نوں وی آپنی خرچ کیتی رقم دا پورا فائدہ لَبھ سکے.

اپنی رائے دا اظہار کرو