256

طوفانی بارشاں، 18 ہلاک، 100 زخمی، فصلاں تباہ

لہور (سجن رپورٹ) ملک چ طوفانی میہنہ وَسن اَتے تیز اَنھیری چلن نال 18 بندے ہلاک تے 100 توں وَدھ زخمی ہو گئے۔ پنجاب دے کئی شہراں چ ہوون آلے وکھو وکھ حادثات چ 11 لوک ہلاک تے درجناں زخمی ہوئے، کئی مکان ڈھیہہ گئے جد کہ گڑے پَین نال کنک دی فصل نوں چوکھا نقصان ہویائے۔ لہور سَنے ساہیوال، چیچہ وطنی، وہاڑی، میلسی، لودھراں اَتے لاگے دے علاقیاں چ زوردار بدل وَسے۔ راجن پور دے سلیمان پہاڑی سلسلے چ ہوون آلیاں بارشاں کارن ندی نالیاں چ پانی چڑھ گیا۔ اگلے 24 گھنٹیاں دوران اسلام آباد، کشمیر، صوبہ پنجاب تے خیبر پختونخوا چ ہور بدل پَے سکدئے۔ صوبہ سندھ چ وی طوفانی بارش ہوئی، میر پور خاص چ اِک بچہ ہلاک ہو گیا۔ کراچی چ 2 بچیاں سَنے 3 بندے ہلاک جد کہ 80 زخمی ہوئے۔ تیز اَنھیری تے مٹی دے طوفان نے تباہی مچا دتی، درخت ٹُٹ گئے تے کئی گھراں دِیاں چھتاں اُڈ گئیاں۔ صوبہ بلوچستان چ 2 بندے ہلاک ہو گئے، گوادر اَتے نیڑے دے علاقیاں چ ہلکی بارش ہوون نال گرمی دی تیزی گھٹ گئی۔ محکمہ موسمیات موجب ایران توں میہنہ بدل وسان والا سسٹم بلوچستان اپڑ گیائے اَتے اگلے تِن دیہاڑ تائیں بلوچستان چ طوفانی بدل وَسن گے جس پاروں صوبے چ سیلاب دا خطرہ اے۔

اپنی رائے دا اظہار کرو