243

جمہوریت نوں بھولن نال ادھا ملک وکھ ہوگیا: جسٹس فائزعیسی

کراچی: سپریم کورٹ دے جج جسٹس قاضی فائز عیسی نےآکھیا اے کہ لوکاں دے ٹیکساں توں تنخواہ لین والیاں اتے آئین دی پاسداری لازم اے۔
اک تقریب وچ خطاب کردیاں جسٹس قاضی فائز عیسیٰ دا کہنا سی 72 سال پہلاں آزادی حاصل لیتی، کوئی جنگ لڑی نہ کسے فوج سانوں اک آزاد ملک دتا۔ اک سوچ تے نظریے اتے یقین رکھن والیاں نے دوسریاں نوں منالیا۔ نا ممکن ممکن وچ بدل گیا، پاکستان بننا اک معجزہ ای سمجھو، ایس معجزے نوں برقرار، محفوظ رکھن لیے اک طریقہ کار دتا گیا، ایس نوں اسیں دستور یا آئین کہندے آں، آئین وچ سدھا سانواں آکھ دتا گیا اے کہ عوام نے ایہہ آزاد ملک حاصل کیتا۔
جسٹس قاضی فائز عیسیٰ آکھیا آئین دے شروع وچ ای مڈھلے حقاں دا ذکر اے، شق 199 تے (3)184 توں عدلیہ بنیادی حقاں اتےعمل درآمد یقینی بناندی اے، جے کوئی بندہ، ادارہ بنیادی حقاں توں ودھ جاوے تاں عدالت کول اختیار اے کہ اوہ ایس نوں روکے، تریخ دسدی اے کہ ادارے اپنے اختیار توں ودھ جاون تاں لوکاں دے مڈھلے حق ختم ہوجاوندے نیں۔ پاکستان بنن مگروں پہلاں جنرل ایوب فیر یحییٰ خان آئے، جمہوری طرز عمل نوں اوہلے رکھ دتا گیا، جیہدے کارن اسیں ادھے ملک توں محروم ہوگئے،
اوہناں آکھیا کہ جد جمہوریت کمزور ہوندی اے، اک بندے دی آواز لوکائی دی آواز نوں دب دیندی اے تاں اوس دا فیدا دشمن چکدا اے، عدلیہ نوں وی چاہیدا اے پئی اوہ اپنے اختیار دے وچ رہ کے کم کرے۔ ادارے تے ملک اوہدوں ای مضبوط ہوندے نیں ہیں جدوں اپنی غلطیاں توں اسیں سکھ دے آں کسے ہور ادارے اتے انگلیاں چکن توں پہلاں میں اپنے ادارے دی گل کراں گا۔
عوام دے ٹیکساں نال تنخواہ لین والیاں اتے آئین دی پاسداری لازم اے، اوہ ایس دا حلف چک دے نیں میرے سنے صدر، وزیراعظم تے افواج پاکستان دے ہر افسر اتے آئین دی پاسداری لازم اے۔

اپنی رائے دا اظہار کرو