256

اعتزازاحسن شرم دوائی، وکیلاں فیر غصہ وکھایا

سنیئر قانون دان تے پیپلزپارٹی دے آگو اعتزاز احسن لہور پی آئی سی واقعے اتے آکھیا سی وکیلاں جو کجھ کیتا اوس اتے ڈاھڈی شرم آئی، ایس دے جنہی مذمت کیتی جاوے گھٹ اے، اوہناں دا کہنا سی لہور وچ 30 ہزار وکیل ہوون گے، جنہاں وچوں 25 ہزار لاہور بار دی ممبر نیں، ایس واقعے وچ دو توں تن سو وکیل رلے جنہاں وچ بوہتے آوندے الیکشن دے امیدوار ای ہوون گے۔ دل دے ہسپتال اوہناں جو کجھ کیتا اوس مگروں وکھائی دین والیاں نوں الیکشن وچ حصہ نئیں لینا چاہیدا۔
اعتزاز احسن دا آکھنا سی ایس واقعے نال سارے وکیلاں دی عزت وی خراب ہوئی، مینوں 50 ورھے ہوگئے ایس کارروائی نال میرا سر شرم نال جھک گیا اے، اسیں کالے کوٹ دی کیہ عزت چھڈی۔
وکیلاں دی کئی تنظیماں اعتزاز احسن دے ایس بیان دے مخالفت کیتی، میڈیا اتے وی بیان سنن وچ آئے، پنڈی دے بار ایسوسی ایشن نے اعتزاز احسن دے مذمت کیتی نالے بار وچ داخلے تے پابندی لادتی، اوہناں دوجی بار ایسوسی ایشناں نوں وی اعتزاز اتے پابندی لاون دی منگ کردتی۔

اپنی رائے دا اظہار کرو