566

مہنگائی تے احترام رمضان

لکھاری
مشرف ظہور
کیہندے نیں رمضان المبارک دے مہینے وچ رزق ودھ جاندا اے – پاکستانیاں دا وی ودھد دا اے پر اوس ودھے ھوئے رزق تے ہر سال رمضان دے بابرکت مہینے وچ کجھ ڈاکو پے جاندے نیں تے لوکاں واسطے اپنا ٹکر پانی چلاونا دوجے دناں نالوں وی زیادہ اوکھا کر دیندے نیں-

56 مسلمان ملکاں وچوں شاید پاکستان تے اکا دکا ھور ملک نیں جیتھے اجیہا کجھ رمضا ن دے بابرکت مہینے وچ واپردا اے- غزہ دا علاقہ جیہڑا کہ پچھلے کئیں ورھیاں توں اسرائیلی محاصرے وچ ھے اوتھے وی رمضان دے مہینے لوکاں نوں سستا تے غریب لوکاں نوں مفت کھانا ملدا اے- ایسے طرحاں ملائیشیا وچ اچیچے رمضان بازار لگدے نیں جتھے سستیاں تے بہت معیاری چیزاں ملدیاں نیں- مسجد کمیٹیاں ملائیشیا وچ اک خاص ڈش بناندیاں نیں جیہڑی کہ وسیب دے لوکاں وچ مفت ونڈی جاندِی اے-
ایسے طرحاں جیہڑے لوک رمضان دے مہینے وچ لندن سفر کر چکے نیں اوہناں نوں پتا ھووے گا کہ وڈے سٹور رمضان المبارک دے دوران چیزاں سستیاں کردیندے نیں-ساڈا گوناڈھی ملک ھندوستان جتھے مسلمان اقلیت نیں اوتھے ایس برکت والے مہینے دوران ناں صرف چیزاں سستیاں ھوندیاں نیں سگوں غیر مسلم دوکاندار کجھ علاقیاں اندر مسلماناں نوں افطار تے سحری کرواؤندے نیں-

افریقی ملک ایتھوپیا جتھے کدی خوراک دی تھوڑ ھوندی سی ایس رمضان وچ اوتھے وی قیمتاں تبدیل نہیں ھوئیاں- ایتھوپیا وچ مسلمان بہت وڈی اقلیت نیں قریب کل آبادی دا 33 فیصد –
ایہہ گل نہیں کہ پاکستان وچ ھی رمضان وچ قیمتاں ودھ دیاں نیں- ااوہناں دو دناں دے وچ چھپن والیاں خبراں توں پتہ چلیا اجیہے دو ھور اکثریتی مسلم ملک ایس خطے وچ موجود نیں جتھے ایس رمضان وچ کھان پیون والیاں چیزاں دیاں قیمتاں آسماناں نال گل کر رھیاں نیں۔ ایہہ دو ملک نیں بنگلہ دیش تے افغانستان- تیناں ملکاں دے شاید اپنے اپنے مسائل تے وسائل نیں تے ایہناں دا مقا بلہ اک دوجے نال شاید ناں کیتا جا سکے پر رمضان دے مہینے وچ قیمتاں دے ودھن دے حوالے نال اک چیز جیہڑی ساریاں دے وچ ایکو جہی ایہہ اوہ ھے قیمتاں نوں مناسب رکھن وچ حکومتی اداریاں دی ناکامی تے چند سرمایہ دار تے مفاد پرست لوکاں دا گٹھ جوڑ-

اک گل ھور سامنے آوندی اے کہ ایہناں ملکاں وچ وڈی گنتی وچ لو کا ں دی خریداری دی وکھ نفسیات اے- لوک اودوں تیک خریداری لئی نہیں نکلدے جدوں مہینہ اکا شروع ھوون والا نہیں ھوندا- اک دم بازاراں وچ رش ودھ جاندا اے تے چیزاں مہنگیاں ھو جاندیاں نیں-
پاکستان وچ رمضان بازار تے لگدے نیں پر ایہناں دے وچ وکن والیاں چیزاں جے تھوڑیاں بہت سستیاں مل وی جاون تے غیر معیارِی ھوندیاں نیں-ھر سال حکومت رمضان سپیشل پیکج دا اعلان وی کردی اے پر قیمتاں تے معیار تے کجھ خاص فرق نہیں پیندا-
پاکستان اندر تے 1981 وچ لاگو کیتا گیا اک قانون وی احترام رمضان آرڈینینس دے ناں توں موجود اے ۔ ایس قانون دے وچ سوائے ھسپتال تے ریلوے اسٹیشناں توں عام تھانواں اتے کھاون پیون تے ہٹک لائی ہوندی اے تے خلاف ورزی کرن والیاں نوں گھٹو گھٹ تن مہینے قید ھو سکدی اے-
سمجھن والی گل ایہہ وے کہ کیا رمضان تو پہلے چیزاں ناجائز منافع خوری لئی ذخیرہ کرلینا اور گھٹ معیار دیاں چیزاں بوہتے مل ویچنا احترام رمضان دے خلاف نہیں؟ حکومت نو ں چاھیدا بئی رمضا ن دے مہینے دوران ناجائز منافع خوری نوں وی احترام رمضان دے قانون وچ شامل کرے تاں جے غریب لوک وی ایس مہینے دوران اپنا کھاون پیون آسانی نال جاری رکھ سکن-

اپنی رائے دا اظہار کرو

6 تبصرے “مہنگائی تے احترام رمضان

  1. بڑی مہربانی جناب دی اس اہم مسئلے نوں زیر تحریر لیان نوں۔۔۔ دعا ای اے کہ اے سنیہاساریاں لوکاں تک پہنچ جاوے

  2. رمضان صرف کھاون پیون دا ناں نیں لوکاں نوں وی سمجھ چاہیدی اے- جیڑہ کجھ گھر موجود اے اوھو صبر شکر کر کے کھاون -دوجی گل ذخیرہ اندوز خود تے حکومتاں دا کسے نا کسے راہیں حصہ ھوندے نیں تے مہنگای نوں ڈک کون لاوے گا-

  3. کج ساڈا بےصبرا ہونا وی اک وجہ اے۔ مسئلہ صرف حکومتی سطح تے نہیں اے۔ مسئلہ ساڈے روئے وچ اے۔ باقی رہی گل رزق دی تےاو رب دا وعدہ اے۔

تبصرے بند ہیں