459

مریم جی دی واپسی

لکھاری ، سہیل وڑائچ

جدوں میاں نوازشریف چھ ہفتے دی میڈیکل ضمانت مگروں پھلاں دے ہارسجائے نعریاں وچ منگل نوں رات جیل واپس اپڑے تے نون لیگ وچ کئی تبدیلیاں ویکھن نوں آئیاں۔
ریلی وچ شہبازشریف دا بیانیہ کدھرے وکھائی نئیں دتاسگوں شہبازشریف نے الٹا اپنے بیان راہیں نواز بیانیے نوں پکا کرن دی کوشش کیتی،نال ای اپنے منڈے حمزہ نوں گڈی چلان دی ذمے واری دتی تاں جے کوئی کسرنہ رہ جاوے۔
ایسراں ہالےتائیں ایہو آکھیاجاسکدا اے پئی جیل جاندے جاندے جتھے نوازشریف مزاحمت دے بیانیے دا جھنڈا فیر توں چک لیا،ایس دے نال ای اپنے دھی مریم نوں وی سیاسی طور تے چوکس کردتا اے۔
انج لگدا سی پئی جیویں نون لیگ لسی پی کے دوپہر دی نیندر لے رہی اے، ہن آس ایہو اے مریم جی والدصاحب دی خاطر کرن تے اوہناں دی بیماری وچ ٹھہل سیوا توں وہیلی ہوگئیاںنیں، ایس لیے سیاست لئی ویلا کڈ لیا اے۔
مریم جی تے نواز شریف دی چپ توں ایہہ معلوم ہوندا اے ہورے شہبازشریف مصالحت دا بیانیہ کم وکھاگیا اے تے نوازشریف دی ڈھل ایسے دانتیجہ اے نوازشریف دی جیل واپسی دا مطلب ایہہ وی اے
نہ خدا ملیا تے نہ یار نال ملاقات ہوئی
شہبازشریف اتے وی دھڑادھڑ نویں مقدمے بن رہے ہیں،ایس صورت وچ مصالحت دا بیانیہ کیویں چل سکدا اے، ایس لیے نونی سیاست نوں ویکھن والیاں داآکھنا اے پئی دوہاں بھراواں جان بوجھ کے نالے طے کرکے چنگا پلس والا، تے مندا پلس والا کھیڈدے نیں۔ اپنی ایس حکمت عملی نال اوہ کئی وڈے وڈے بحراناں توں نکلے نیں ۔ ایس واری وی اوہ ایسے کارروائی اتے کم کررہے نیں۔ کدے مصالحت جیویں کہوگے کرلاں گے، تے کدے جارحانہ سیاست ،چھڈاں گے نئیں،اوہناں نوں جس دی لوڑ ہووے گی اوس نوں کھیڈن گے۔
جاتی امرا سے کوٹ لکھپت جیل تیک نون لیگ دی ریلی تنظیم دی اک آزمائش سی۔ الیکشن مگروں نون لیگ دی تنظیماں اتے جیہڑی چپ لگی سی نوازشریف دی جیل واپسی ایس دا امتحان سی۔ اسمبلی ممبراں تے پارٹی تنظیماں دوہاں حرکت وچ آگئیاں۔ سچ ایہہ وے پئی ، ایہہ ناں تے بے نظیر دے دس اپریل 1986 ورگا سی تے ناں ای عمران خان دے اکتوبر 2011 مینار پاکستان ورگا سی۔ ہاں کاروباری وچلے طبقے دی نمائندہ ن لیگ حوالے نال ایہہ کافی متاثر کن سی۔
کلف والے چٹے تے ہلکے رنگ دے کپڑے پاون والے 100 کلو گرام توں ودھ بھاری بزنس مڈل کلاسیے بیلٹ بکس تیک بڑی خوشی نال ووٹ پاون اپڑجاندے نیں، ایہناں نوں سڑکاں اتے آوندے گھبراپیندا اے۔ ایہہ بزنس مڈل کلاس اوہدوں گھروں تے دکاناں توں نکلدی اے، جدوں اوہناں دے کاروبار نوں ڈھڈا خطرہ یاں اوہناں دے مذہبی عقیدیاں نوں کوئی چیلنج کردے۔
1977 دی تحریک وچ کامیاب ہڑتالاں ایسے بزنس کلاس کیتی سی، ہن وی ایہدی اکثریت نوں لیگ دے نال اے۔ اوہ ہڑتالاں اتے راضی نئیں ہوندی۔ تحریک انصاف دی پالیسیاں اتے ایس طبقے نیں اپنی ذاتی دولت دی گردش تے سرمایہ کاری بند کر دتی اے،یاں فیر اوہ بجٹ وچ ٹیکس لگن اتےاحتجاج کردے وکھائی دیون گےیا فیر چپ دی چادر لپیٹ کے گھراں وچ چنگے ویلے دی اڈیک وچ بیٹھ جاون گے۔
مسلم لیگ نوں دی حکمت عملی ایہو اے کہ آپے تحریک چلان دی تھاں ایس ویلے اڈیک کیتی جاوے جدوں لوکیں ٹیکساں تے مہنگائی توں تنگ آکے آپ باہر نکل جاون گے۔ ایہو جیا موقع آون اتے نون لیگ بھرواں کردار اداکرے گی۔
مستقبل دی اینٹی اسٹیبلشمنٹ سیاست وچ دو وڈے ناں ای اچیچے ہوون گے۔ بلاول بھٹو تے مریم نواز۔ بلاول بھٹو کل وقتی سیاست کررہے نیں جد کہ مریم نواز ویلے کہ ویلے کردیاں نیں۔ ایہہ ٹھیک اے اوہ زنانی اے ،اک دھی اے نالے چڑھدے دی دھی ہوون کارن اپنے والد دی بوہوں وفادار اے۔ جے والد نوں لوڑ ہووے تاں سبھ توں اگے آجاندی اے نئیں تاں والد دی خدمت وچ لگی رہندی اے۔
سیاست دا ایہہ اندازہمیش چلاناسوکھا تےممکن نئیں، اوہناں نوں ہن کل وقتی یعنی ہرویلے دی سیاستدان بننا ہووے گا۔
نرا والدبچاؤ مہم وچ رجھے رہن اتے مخالف پہلاں ای اوہناں اتے تنقید کردے رہے نیں، تے اوہ اگے وی انج کردے رہن گے۔ سیاست ہرویلےکرن والا کم اے، جنہوں کسے وی مصلحت تے رعایت بغیر جاری رکھنا پیندااے۔ ایہہ نئیں کہ والد بیمارہووے تاں تسیں چوکس ہوجاو، والد گھر آجاوے تاں تساں سیاست وچ وقفہ لے لوو، فیر والد اتے کوئی مشکل آوے فیر باہر نکل آؤ۔
سیاست وچ مریم دامستقبل اوہدوں ای بنے گا،جد اوہناں دا مستقل کردار ہووے گا۔سیاست دے پڈھیار جانندے نیں ایوب خان دور وچ جدوں بھٹو جیل توں باہر آئے تاں اوہناں کہہ دتا ہن نصرت بھٹو تے اصغر خان گھر بیٹھن میں باہر آگیاہاں، جیہدا مطلب سی کل وقتی سیاستدان بھٹو جیلوں آگیا، ہن عارضی سیاستدان نصرت بھٹو تےاصغر خان گھرچلے جاون۔ مریم وی عارضی سیاستدان رہون تاں کل اوہناں توں حمزہ وی اجیہا مطالبہ کرسکدا اے، جے مریم سیاست نال سنجیدہ ہن تاں وچوں غائب ہوون والے وقفے بند کردین تے ہر ویلے دی سیاستدان بن جاون۔
باقی رہ گیا حمزہ شہباز شریف تے مریم نواز دامقابلہ تے صاف گل اے کہ بیانیے دی جنگ وچ مریم دا جارحانہ رویہ اوہناں نوں فیدہ دے سکدا اے جدکہ حمزہ کئی ورھیاں توں گورننس تے عملی سیاست دے گنجل کھول رہے نیں، ایس لئی اوہناں داتجربہ کافی ہوگیا، تریخ کیہ کروٹ لیندی اے ایس دا قیافہ لانا مشکل اے ہاں نون لیگ نوں مستقبل وچ اسٹیبلشمنٹ دی قربت ملنابوہوں مشکل اے، ہاں ایہہ ضرور اے اک وڈے مخالف دے طور اوہناں نال معاملہ ضرور ہوسکدا اے۔
مریم دی سیاست وچ کامیابی اوہناں دے تیکھے بیانیے وچ لکی اے۔ ویکھناایہہ وے پئی آون والے دناں وچ کیہ تیاری کیتی جاندی اے، کیہ اوہ وی ویلے پین اتے تحریک انصاف وانگ اناڑی ثابت ہوون گئیاں ۔ کیہ اوہ پہلاں اپنی ٹیم بناون گئیاں، معاشی تےسماجی تبدیلیاں دا ایجنڈا تیار کرن گئیاں یا فیر صرف خالی نعریاں نال تبدیلی لیان دی کوشش کرن گئیاں۔
جولائی توں دسمبر 2019 دا عرصہ ن لیگ لیے کافی اہم اے۔ اوس نوں ہر صورت شہراں وچ احتجاج کرنا پوے گا نئیں تاں اوہناں دا ووٹ بینک مایوس ہو کے ایدھر اودھر وکھر سکدا اے، احتجاج شروع ہوئے تاں نون لیگ دا ووٹ بینک فیرتوں پکاہوجاوے گا۔

اپنی رائے دا اظہار کرو