483

لہور دی تریخ، کنہیالال، قسط 3

لہور اتے پہلا حملہ
اسلامی سلطنت شروع ہوندیاں ای پہلا صدمہ لہور شہر اتے سلطان محمود غزنوی دے حملے دی صورت آیا۔ اُس نے راجہ جے پال بن اننگپال بن جیپال برہمن والی لاہور 413 ہجری وچ کیتا، ایس حملے دا کارن ایہہ بنیا کہ جدوں راجہ قنوج، محمود دے حملیاں توں تنگ آگیا تاں اوس دی اطاعت قبول لئی۔ تے اسلام دا مطیع بنے رہن دا حلف چالیا۔ ایس گل توں سارے ہندوستان دے راجے ناخوش سن خاص کر راجہ کالنجربوہت زیادہ ناراض ہوگیا اوس آکھیا راجہ قنوج نے مسلمان دی اطاعت کیوں قبول کیتی۔
جد محمود ہندوستان چھڈ کے گیا، راجہ قنوج کلا رہ گیا اوس ویلے راجہ کالنجر تے ہور راجیاں دی فوج قنوج اتے چڑھ دوڑی۔ راجہ قنوج نے تیز رفتار خبری غزنی گھلیا، بادشاہ نوں اپنی حمایت لئی سدلیا۔ بادشاہ اپنے نال بلوچ یلغر لے ایا، اوس دے ہندوستان وڑن تیکر راجہ قنوج جنگ وچ ماریا جاچکیا سی۔ ایہہ گل سن کے محمود نوں ڈاھڈا غصہ آیا، تے راجہ کالنجر دے علاقے وچ داخل ہوکے کئی پنڈاں وچ لٹ مار کیتی بستیاں اجاڑ چھڈیاں، اوس دا ارادہ سی پئی راجہ کالنجر نوں سخت سزا دیوے گا پر پچھوں غزنی توں قاصد آکے کوئی اجیہی خبر سنائی کہ بادشاہ نوں پرت کے جانا پے گیا۔ اوس اپنی مہم ادھ وچ چھڈنی پئی۔ جدوں اوہ لہور اپڑیا ایتھے راجہ جیپال جیہڑا کے محمود دے خراج گزاراں وچوں سی اوس وی محمود خلاف راجہ کالنجر دی مدد لئی فوج گھلی سی۔ بادشاہ جد راجہ توں جواب طلب کیتا تاں اوہ کوئی جواب نہ دے سکیا، اوس نوں پک ہوگیا کہ بادشاہ غصہ کرگیا تے اوس نوں مار چھڈے گا۔ اوس محمود خلاف جنگ دا میدان لالیا۔ بادشاہ دی فوج نے دو حملیاں وچ سی راجہ نوں نسن اتے مجبور کردتا۔ راجہ ہارن مگروں شہر وچ وڑ گیا، کجھ دیہاڑے کندھاں پچھوں لڑن دے جتن کردا رہیا، فیر اوتھوں لکدے لکاندے فوج سمیت نس گیا۔ بادشاہ اپنی جت دے نشے وچ سی اوس دا خیال سی رعایا اوس دا بھرواں سواگت کرے گی، پر شہریاں دروازے بند کردتے، بادشاہ نوں غصہ آگیا،اوس فیر توں فوج دی چڑھائی دا حکم دے دتا، ہن فوج دی شہریاں نال جنگ شروع ہوگئی۔ شہر کجھ دیہاڑ ای لڑسکے فیر اوہناں تنگ آکے دروازے کھول دتے، جدے مگروں فوج نے لٹ مار تے قتلام شروع کردتا۔ گھراں نوں ساڑیا تے ہزاراں بندے ماردتے۔ باقی جان بچاکے نس گئے۔ ایہہ سوہنا شہر دو دیہاڑ وچ کھنڈر بن گیا۔ محمود ایس کم توں وہیلا ہوکے غزنی ٹرگیا، شہر لہور کجھ ورھیاں تیک ویران ای رہیا۔ جدوں ملک ایاز بادشاہ دے حکم اتے پنجاب دا حاکم بنیا تاں اوس نیں شہر نوں مڑتوں وسایا ایہہ شہر کجھ چر وچ ای عالم فاضلاں دا مرکز بن گیا۔ شیخ علی گنج بخش ہجویری ورگے عالم فاضل والی لوک غزنی تے غور غیرملکاں توں آکے ایتھے وس گئے۔

اپنی رائے دا اظہار کرو