328

زلف دے کنڈل تے اعتراض کرن دا جرمانہ ڈھائی لکھ ڈالر

نیو یارک (سجن رپورٹ ) نیو یارک شہر دے انسانی حقاں دی کمیٹی نے فیصلہ کیتا اے بئی کسے دے والاں(زلفاں) پاروں کسے نوں نندنا، نوکریوں کڈھنا یاں آوازاں لگاون نوں نسلی وتکرا قرار دتا جاوے گا۔
کمیٹی ولوں دتے گئے اصول اگلے ہفتے توں لاگوں ہوون گے جنہاں وچ آکھیا گیا اے بئی کسے نے جے کنڈل والی زلفاں رکھیاں نیں یا گت کیتی اے یاں نکے وال رکھے نیں تے بھانویں لمی لمی لٹاں رکھیاں یاں ٹنڈ کرائی اے ، اوہدے والاں دے سٹائل تے اعتراض کیتا تے اوہنوں نسلی وتکرا سمجھیا جاوے گا۔
دسیا جاندا اے بئی ایہہ نواں قانون کالیاں دے والاں دے سٹائل اتے اعتراض کرن والیاں نوں ڈکن لئی بنایا گیا اے۔ نویں قانون دے مطابق جے کسے نے والاں دے سٹائل پاروں کسے تے اعتراض کیتا، نوکریوں کڈھیا، یا اوس دی تنزلی کیتی یا دکھ دتا اوس نوں ڈھائی لکھ ڈالر تائیں جرمانہ ہو سکدا اے۔

اپنی رائے دا اظہار کرو