452

علی وزیر دی کہانی…..

‘طالبان پروجیکٹ’ دی پہلی ٹارگٹ کلنگ 2003ء چ جنوبی وزیرستان اندر فاروق وزیر دی سی جیہڑا علی وزیر دا بھرا سی۔ فاروق وزیر دا گناہ کیہہ سی…؟ گناہ ایہہ سی کہ اوہنے ‘طالبان تے غیرملکی دہشت گرد’ پروجیکٹ دی مخالفت کیتی۔
علی وزیر دا ٹبر احمد زئی وزیر قبیلے دے اثر رسوخ والے تے طاقتور خانداناں وچوں اِک ہے۔ نظریاتی حوالے نال قوم پرست تے دہشت گردی دا مخالف، فاروق وزیر ایس فکر دا پہلا شہید بنیا پَر آخری نئیں۔
فاروق وزیر دے قتل بعدوں طالبان نے اوہدے بالاں نوں وی نئیں بخشیا اَتے سکولاں چ جا جا اُستاداں کولوں علی وزیر خاندان دے بالاں بارے پُچھ پرتیت کر دے رہے۔ سِٹا ایہہ نکلیا کہ بالاں نوں سکول چَھڈنے پئے۔ اوہناں دے گھر کفن گَھلے گئے، اوہ فیر وی ڈٹے رہے۔ 2005ء چ علی وزیر دے باپ ملک مرزا عالم نوں دو پُتراں تے دو بھتیجیاں سَنے قتل کر دِتا گیا۔ جد اوہناں دے جنازے چُکے جا رہے سن اوس ویلے علی وزیر علاقائی ذمہ داری تحت جیل اندر سی تے اوہناں نوں جنازے چ رَلن دی اجازت نا دِتی گئی کہ اوہناں دے ہتھاں چ ہتکھڑیاں ہون گیاں۔ جد اوہ آپنے گھر وَڑھے تے ماں نے جپھا مار کے تسلی دِتی کہ کوئی گل نئیں شیر جَم دے تے مَر دے نیں۔ کُجھ چِر بعد فیر اوہناں دے اِک ہور بھرا تے تِن دوجے رشتےداراں نوں اکٹھے قتل کر دِتا گیا۔
علی وزیر دے گھر بالغ مرداں دی گنتی گھٹ، یتیم بچیاں تے بیوواں دی چوکھی اے۔ اوہناں نوں نا خالی ایہناں سبھناں دی دیکھ بھال کرنا سی سگوں ہر اِک دے منہ تے اوہناں دے باپ، بھراواں تے پُتراں دِیاں درد بھریاں یاداں تے آپنی بے بسی لِکھی سی۔ ایہہ سبھ کُجھ ہوندیاں وی اوہ طالبان دی مخالفت کرن توں پچھے نا ہَٹے۔ اوہناں دی ذاتی تے قبائلی طاقت گھٹ کرن لئی طالبان نے اوہناں دے معاشی قتل دا فیصلہ کیتا۔
اِک پاسے ٹبر دے 17اں لوکاں کولوں جیون دا حق کھو لیا گیا تے دوجے پاسے یتیماں تے بیوہ زنانیاں کولوں روٹی کھون دا جتن کیتا گیا۔ ایہدا مقصد شائد ایہہ سی کہ خاندان دے زندہ بچ جان آلے لوکاں نوں بھیک منگن تے مجبور کر کے اوہناں دی عزت نوں ملیامیٹ کیتا جا سکے۔
ایس لئی اوہناں نے پہلا وار ایہہ کیتا کہ جنوبی وزیرستان دے اعظم ورسک علاقے چ علی وزیر دا پٹرول پمپ ڈھا دِتا۔ کلیجہ ٹھنڈا نا ہویا تے بقول علی وزیر حملہ آوراں پٹرول پمپ دِیاں اینٹیں اَکھڑوا کے اوہناں کولوں ٹائلٹ بنوایا۔
جد مشال ریڈیو دے سَنگی شاہین بونیری نے علی وزیر کولوں پُچھیا کہ ٹوائلٹ کیوں بنوایا گیا؟ بقول علی وزیر اوہناں نوں کہیا گیا کہ ایہہ منافقاں دے کوٹھے دِیاں اِٹاں ہین تے ایہناں دی تھاں گندگی دی نشانی سمجھی جان والی تھاں ہی ہو سکدی اے۔ دہشت اَتے نفرت دی انتہا ویکھو کہ اِٹاں نوں وی ٹائلٹ چ چُن چُن کے سزا دِتی گئی۔
اوہناں دا نواں بنیا بنگلہ ڈَھا دِتا گیا تے اعظم ورسک چ اوہناں دے باغ اُتے زہریلا کیمیکل چھڑک کے فصلاں نوں تباہ کر دِتا گیا۔
ستمبر 2016ء چ پولٹیکل انتظامیہ تے سکیورٹی فورسز نے اجتماعی ذمہ داری دے قانون تحت وانا چ علی وزیر دِیاں 120 دکاناں دی مارکیٹ بمباں نال اڑا کے تباہ کر دِتی۔ جنوبی وزیرستان چ اوہناں دے ٹَبر دے جانی تے معاشی قتل عام بعد جدوں برباد کرن لئی ہور کُجھ وی نا بچیا تے علی وزیر کولوں آخری ذریعہ معاش وی کھو لیا گیا۔ ڈیرہ اسماعیل خان دے بنوں اڈے چ اوہناں دا ٹرانسپورٹ ٹرمینل وی بند کر دِتا گیا۔
علی وزیر دے کَہن موجب جنوبی وزیرستان چ فوجی آپریشن دوران لوکاں دی جان تے مال نوں ہون والے نقصان دے بدلے اِک معاہدے تحت حکومت جیہڑا تاوان دِتا علی وزیر نوں اوہ وی نا لَبھیا۔
علی وزیر آپنے نال ہون آلے ظلماں نوں بُھل کے منگ کیتی کہ اوہناں نوں گیس، بجلی، سڑک تے سکول نئیں چاہیدے، آئین پاکستان چ زندہ رَہن دی جیہڑی ضمانت دِتی گئی اے اوہناں نوں خالی اوہ حق دِتا جائے۔
مشال ریڈیو نال اک انٹرویو دوران اوہ ایس حق چ ترمیم کر دیاں ایس حد تک گئے کہ جیون دا جیہڑا آئینی حق پنجاب دے کسے بندے نوں سو فیصد ملیا اے اودے وچوں خالی 20 فیصد ضمانت اوہناں نوں دِتی جائے۔
جیہڑے لوک کہندے نیں کہ پہلے کتھے ساؤ، اوہ اِک وار فیر پورا سن لین۔
Manzoor Ahmad Pashteen
(اُلتھا: طارق بٹ)

اپنی رائے دا اظہار کرو

علی وزیر دی کہانی…..” ایک تبصرہ

  1. sysi masala fauji taqat de istaimal kar toon hoar kharab ho si. mein noo tajjab hae ennay saray tajraban pechay jis de karan saday mulk da sab too wadda sooba alaehda hua sada hakim waziristan da masla taqat toon hall karan dia khatarnakk rasta chunia je..bas karo

تبصرے بند ہیں