361

ویڈیو سکینڈل، جج ارشد ملک نوں ہٹاون دافیصلہ، سپریم کورٹ سنوائی کریگا

اسلام آباد:سپریم کورٹ نے احتساب عدالت دے جج ارشد ملک دی وڈیو لیک سکینڈل اتے تن ممبری بینچ بنادتا، چیف جسٹس دی آگوائی وچ بینچ 16 جولائی نوں سنوائی کرے گا۔

ایس توں پہلاں اسلام آباد ہائیکورٹ دے قائم مقام چیف جسٹس نے مسلم لیگ (ن)ولوں جاری ویڈیو تے الزام اتے احتساب عدالت جج ارشد ملک نوں عہدے توں ہٹاون لئی وزارت قانون نوں خط لکھ دتا،
وزیر قانون ڈاکٹر فروغ نسیم نے آکھیا اے اسلام آباد ہائی کورٹ دے خط نوں ویکھ دیاں احتساب عدالت نمبر 2 دے جج ارشد ملک نوں کم کرن توں روک دتا اے، اوہناں نوں لا ڈویژن رپورٹ کرن لئی آکھ دتا گیا۔
ارشد ملک اپنی صفائی وچ چیف جسٹس نوں اک خط گھلیا۔جیہدے وچ دسیا کہ مسلم لیگ نون نے دو کروڑ یورو رشوت دی پیش کش کیتی۔
احتساب عدالت جج ارشد ملک نوں چیف جسٹس اسلام آباد ہائیکورٹ دو توں تن واری سدیا، تے اوہناں توں پچھ پڑتیت کیتی، لیگی کارکن ناصر بٹ نال گل بات بارے پچھے سوالاں بارے جج ارشد ملک چیف جسٹس نوں تسلی جوگ جواب نہ دے سکے۔
دوجے پاسے جج ارشد ملک اک بیان حلفی جاری کیتا کہ نوازشریف اوہناں نوں مونہہ منگی رقم دیون دی پیشکش کیتی۔ نال آکھیا اوہ کسے وی ملک وچ رقم اداکرسکدے نیں۔ 6 اپریل 2019 نوں جاتی امرا وچ نوازشریف نال اپنی ملاقات بارے وی دسیا۔
جج دا آکھنا اے رقم دی پیشکش رد کرن اتے، اوس نوں ناصر بٹ ولوں دھمکیاں ملیاں۔ ناصر بٹ آکھیا نوازشریف نے قتل دے پنج مقدمیاں وچ اوس نوں بچایا، ایس لئی نوازشریف خاطر کسے حد تیک جاسکداآں۔
ارشدملک دسیا جدوں ملاقات وچ انکار کیتا،نوازشریف بڑی ناگواری وکھائی۔میں اوہناں نوں آکھیا میں میرٹ اتے فیصلہ کیتا۔ جیہدے مگروں ملاقات مک گئی۔
بیان حلفی وچ ارشد ملک ایہہ وی دسیا کہ نوازشریف دے پتر حسین نواز وی اوس نوں 50 کروڑ جروپے رشوت دی پیش کش کیتی۔ پورے ٹبر نوں برطانیہ، کینیڈا یا مرضی دے ملک گھلن لئی آکھیا۔

اپنی رائے دا اظہار کرو